2018 senesinden 2020 senesine qadar işğal etilgen Sevastopol (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad) limanlarına yedi kere kirdi, soñra ise Odesağa yol aldı, anda onı tuttılar. Bu, hırsızlanğan ukrayin ububatını Afrika memleketlerine alıp ketken Rusiye "kölge flotu"nıñ quru yük taşıyıcısıdır. Gemi bir buçuq aydan berli apiste buluna, onıñ saibi ise MHMŞMilliy havfsızlıq ve mudafaa şurasınıñ sanktsiya cedvellerinde qayd etilgen. Gemide Yaqın Şarqtan kelgen 17 adam bar edi.
Deñiz qoruvı Rusiye Federatsiyasınıñ "kölge flotu"nıñ quru yük taşıyıcısını nasıl tutqanını kösterdi. Suspilne Qırım muarririyeti qanunnı bozğanlarnı ne bekleycegnini ögrenecek.
İlk qış ayınıñ 10-nda Odesa limanında quru yük taşıyıcısı tutuldı.
"Qayd etilgen geminiñ Odesa limanına kirmek ıntıluvları aqqında malümat evelden alındı. Qısqa müddet içinde UHHe haber etildi, tintüv ve apiske alınması içün mahkeme qararı alındı. Gemi kelgende tahqiqat tedbirleri keçirildi, neticesinde gemi yaqalandı ve apiske alındı", — dep Ukrayina Devlet sıñır hızmetiniñ deñiz qoruvı birinci bölüginiñ arbiy hızmetçisi Maksım qayd etti.
2021 senesi qara qış ayınıñ soñunda bu quru yük taşıyıcısı işğal etilgen Qırımdan aman-aman yedi biñ tonna ububatnı çıqarğan edi. Bir seferde Afrika memleketlerine. Tolu miqyaslı istilâ başlanğan soñ, hırsızlanğan ububat yarımadadan çıqarılmadı, amma uquq qorçalayıcılar 2022 senesine qadar bütün reydlerni qayd ettiler.
"Tamam bu gemi Qırım yarımadasından ukrayin ububatını çıqarmaq içün qullanılğan edi. 2018 senesinden 2020 senesine qadar böyle vaqialar qayd etildi, amma biz er bir böyle adiseni taqip etmek maqsadınen taqip etemiz", — de Ukrayina havfsızlıq hızmetiniñ Qırım MCdeki baş idaresiniñ hadimi bildirdi.
Onıñ aytqanına köre, bu tankerni UHHUkrayina havfsızlıq hızmeti ve Ukrayina Devlet sıñır hızmetiniñ bölükleriniñ ortaqlarımıznen işbirligi neticesinde apiske almağa imkân oldı.
Odesada tevqif etilgen vaqıt gemide kapitan ve 16 erkân azası bar edi — episi Yaqın Şarq vatandaşları. Quru yük taşıyıcısı Odesağa Liviyanıñ Tripoli limanından keldi.
Saibi, MHMŞnıñ sanktsiyalarına oğrağan edi, şunıñ içün geminiñ adları muntazam sürette deñiştirile ve üçünci memleketlerniñ şirketlerine ğayrıdan qayd etile edi. Bu Rusiye "kölge flotu"nıñ gemileri içün adiy bir şey, dep Qırım MC ve Sevastopol (Aqyar) şeeri prokurorlığınıñ bölüginiñ yolbaşçısı Yeğor Rebrov añlattı.
"Tolu miqyaslı istilâ başlanğan soñ bazı ecnebiy gemiler faalleşti, ruslar sanktsiyalardan qaçınmaq içün gemilerini ecnebiy şirketlerge ğayrıdan qayd etmege başladılar. Misal olaraq, Odesadaki soñki adise. Gladius gemisini tutıp aldıq — o, şimdi de-yure sahte Panama şirketi adınen qayd etilgen", — dep o bildirdi.
UHHniñ vekili dey ki, "kölge flotu"nı aydınlatmaq içün yoldaş resimleri ve halqara malümat bazaları qullanıla
"Biz endi 86 geminiñ vesiqalarını mahkeme içün azırladıq. Amma daa yüzden ziyade gemi aqqında malümat üzerinde çalışamız, ve er biri boyunca, ümüt etem ki, mütenasip qarar alınacaq", — dep UHHniñ Qırım MCdeki Baş idaresiniñ hadimi "Silver" qayd etti.
Qırım Muhtar Cumhuriyeti prokurorlığı, 2022 senesi Rusiyeniñ Ukrayinağa tolu miqyaslı istilâsından evel, gemilerniñ Qırım limanlarına qanunsız kirişinen oğraşqan edi.
"Bizim bunıñ içün cinaiy davamız bar. Tolu miqyaslı istilâ başlanğan soñ Qırım limanlarından qanunsız şekilde köy hocalığı mahsulatınıñ çıqarılması boyunca daa bir dava açıldı", — dep Rebrov bildirdi.
Onıñ qayd etkenine köre, gemilerniñ esas qısmı rustır. Qırım prokurotlığı mahkeme qararınen gemilerni ğıyabiy apis etmek ameliyatını başlattı, bu ise, cinayet yapmaq içün qullanılğan bir vasta olğanı içün, gemilerniñ zapt etilüviniñ sebebi ola.
"Anda bir dava çerçivesinde 54 qarar aldıq, ubuat çıqarılmasına dair dava çerçivesinde — 16 gemi apiske alındı. Amma olarnıñ çoqusı, elbette, añlaşılacaq sebeplerden, ya da Ukrayina uquq qorçalayıcı organlarınen körüşüvlerden qaçına, atta, bizler halqara uquqiy vekâlet sayesinde böyle yaqalavlarnı başlata bilecek medeniy memleketlerniñ limanlarına kirmemege tırışa", — dep muhtariyet prokurorlığınıñ bölüginiñ yolbaşçısı ayttı.
Apiske alınğan gemiler, Qıdıruv ve aktivler idaresi agentligi olğan QAİAe berile. Bir qısmını idare eteler, bir qısmını ise satıp alalar.
"Bugün apiske alınğan aktivler boyunca eki tedbir keçirile. Bu apis etilgen aktivlerniñ idare etüvi ve satıluvıdır. Gemilerniñ bir qısmı işke tüşürildi, bir qısmı idare etildi. Gemi idarege berilse, QAİA qıymetini kese. Eger gemi satılsa, qıymet kesüvni elektron bazarlıq teşkilâtçısı yapar. Gemilerniñ bir qısmı idarege berildi — 9 gemidir", — dep QAİAniñ yolbaşçısınıñ vazifelerini vaqtınca eda etken Yaroslav Maksımenko bildirdi.
Eki evelki gemini — USKO MFU ve Ankanı — yaqalamaq içün mahsus tedbirler keçirildi. Kamerun bayrağı altında USKO MFU gemisi 2024 senesi oraq ayında tutulğan edi. Tintüv Ukrayina-Romania sıñırındaki Dunay suvlarında yapıldı. Anka 2025 senesi çiçek ayında Reni limanında tutuldı. Gemi Tanzaniyanıñ bayrağı altında yaldap kete edi.
"Olarnıñ episini tinttiler. Şu cümleden, taqiqat etilgen qanunsız faaliyetni tasdıqlağan malümat tapıldı. Kapitanlarğa şübeler bildirildi. Çoqusı allarda olar sabıq kapitanlar ola, yani tek USKO MFU gemisinde Qırımğa kiriş yapqan kapitan bar edi", — dep Rebrov qayd etti.
QAİAniñ yolbaşçısınıñ vazifelerini eda etkeniniñ bildirgenine köre, USKO gemisi yılnıñ soñunda satıldı.
"Bücetke 2,5 million ğrıvnâ satıştan ve aman-aman 4,5 million ğrıvnâ gümrük ödemelerinden keldi. "Anka" gemisi şimdi satıla, onıñ fiyatı 16,5 million ğrıvnâdır", — dep Maksımenko qayd etti.
Ukrayina işğal etilgen Qırımğa qanunsız gemilerniñ ketirilmesini vesiqalandırmağa devam ete. Havfsızlıq hızmeti dey ki, böyle gemilerni teşkerüv mehanizmi işlep çıqarıldı ve yaqın vaqıtta bir qaç yaqalanacaq.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
