Uydurılğan "Hizb ut-Tahrir davası"nıñ ekinci Sevastopol (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad) gruppasınıñ mabüsi Rustem Tairov, işğal etilgen Qırımdan 2500 kilometr uzaqlıqta bulunğan Udmurtiyanıñ Hohrâkı köyündeki 8-nci müstemlekeni karantin kamerasında buluna. Qara qış ayınıñ 22-nde advokat onı ziyaret etti.
"Qırım birdemligi"ne advokat Nazim Şeyhmambetov bunı bildirdi.
55 yaşındaki Rustem Tairov 2024 senesi saban ayından 2025 senesi ilk qış ayına qadar Vladimirniñ 2-nci apishanesinde tutula edi, soñ onı müstemlekege etap ettiler.
"Kelgen soñ, adamnı teşkerdiler, fluorografiya ve kardiogrammanı yaptılar. Tairovnıñ şikâyeti yoq. Qırımtatar müstemlekedeki yaşayış şaraitli yahşı olğanını ayttı: kamerada yarıq, temiz, sıcaq, aftada eki kere hamamğa bara. Onıñ aytqanına köre, suv bar, lâkin çiy suv içmey. O, aş miqdarı ve çeşiti "normal" olaraq adlandırdı, amma bazıda domuz etinen aşlar berilgenini qoştı", — dep haberde qayd etildi.
Rustem Tairov şunı da qayd etti ki, oña yapılğan basqı aqqında malümat yoq, müstemleke memuriyeti ve hadimleriniñ areketlerine şikâyet yoq. Apishanesinde bulunğan vaqıt oña qarşı iç bir cinaiy dava açılmadı. Ceza mabüsiniñ telefon ve körüşüv aqqı bar.
Tairovnıñ aytqanına köre, müstemlekede cami bar, lâkin karantinden tış diniy merasimlerni keçirip olamaycaqmı — şimdilik belli degil.
2023 senesi mayıs ayında Cenübiy bölgeniñ arbiy mahkemesi Qırım musulmanına qanunsız şekilde 12 yıllıq apis cezasını berdi, onıñ ilk dört yılı apishanede keçirilecek, azatlıqtan soñ bir yılı sıñırlanacaq. O yılnıñ boş ayında istinaf mahkemesi Rustem Tairovnıñ ükmüni deñiştirmedi.
"Hizb ut-Tahrir davası"nıñ ekinci Aqyar gruppası aqqında ne bilemiz
2021 senesi arman ayınıñ 17-sinde işğal etilgen Qırımda rus quvetçileri, qırımtatarlarnıñ evlerini kütleviy olaraq tintken soñ beş qırımtatar adamını tuttılar: Aqyarnıñ Nahimov rayonından faalci Rustem Murasov ve Rustem Tayirov, Balıqlava rayonından Cebbar Bekirov, Bağçasaray rayonında faalci Zavur Abdullaev ve Aqmescit rayonından Reyif Fevziev.
O zaman Musarov ekinci kere tutuldı. Birinci kere 2016 senesi kiçik ayda tutuldı, amma birazdan azat etildi. Bu sefer ise faalci Rostov-na-Donudaki qırımtatarlarnıñ dava oturışlarından qaytqan soñ tutuldı. Öz halqınıñ temsilcilerini destek etmek maqsadınen o yerge ketti.
Hizb ut-Tahrir, islâm siyasiy fırqasıdır. 2003 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, "qanunlarğa qarşı faaliyet"te ve böyle degen "cian hilâfeti"ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
