Sevastopolnıñ (AqyarnıñRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad) işğalci akimiyeti tarihiy mirasnıñ qoruvı içün yañı qaidelerni kirsetti - şeerde qoruv zonalarını eksiltti ve tarihiy yerleşüv alanında topraq ya da qurucılıq işlerinden evel arheologik tarla işlerini lâğu etti.
ARC bu aqqında bildire.
"İlk qış ayınıñ soñunda istilâcınıñ Medeniyet nazirligi № 2049 buyruğı ile Sevastopolda (Aqyarda) "tarihiy mirasnıñ qoruvı aqqında" № 1864 evelki buyruqnı deñiştirdi. "Yañı qaideler" qurucılarnıñ "canlarını qolaylaştırmaqta", "tarihiy yerleşüv alanında topraq ya da qurucılıq işlerinden evel arheologik tarla işlerini" lâğu etip, işğal etilgen şeerde "qoruq alanlarını" qısqartmaqta. Bu "merhamet sisteması" tek işğalcilerniñ "tarihiy miras içün qayğı" numayışından yorulğanını degil de, ükümge yaqın olğan qurucılarğa "qıyın vaqıtlardan" keçkenlerinde "qoşma destek köstermek" ıntıluvını köstere, dep haberde aytıla.
Vesiqa metni işğal etilgen Qırımnıñ medeniyet nazirliginiñ saytında derc etildi.
İşğalci Fortpost neşiriniñ yazğanına köre, yañı emir Aqyarnıñ büyük qısmını dört sıñırlav rejimine böldi — R-1den R-4ge qadar.
"Aynı zamanda "standart" olaraq yapılğan areketler kenişletildi — şimdi 2016 senesine qadar, şu cümleden 2014 senesine qadar ukrayin izinlerine köre obyektlerni ğayrıdan tiklemek, mevcut sıñırlardan ziyade olğan binalarnı tamir etmek, em de yañı infrastruktura yerleştirmek mümkün", — dep haberde aytıla.
Hatırlatamız, işğalciler Bağçasaraydaki Han sarayınıñ "restavratsiyasını" 2027 senesi ilk qış ayında bitirmege planlaştıralar, dep bildirdi.
Qırım medeniyet naziriniñ muavini Olğa Vorobyova bu aqqında bildirdi, dep RİA "Novosti Qırım" yaza.
Onıñ aytqanına köre, leyhanıñ fiyatı — 4 milliard rubleden ziyadedir, kompleks terkibine 16 obyekt kire — olardan 12-si ğayrıdan tiklendi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
