İşğalli Qırım akimiyeti, Yevpatoriya (KezlevRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad) deñiz limanınıñ aktsiyalarınıñ 100%-ini 192,9 mln rublege (100,3 mln ğrıvnâ) sattı.
"Torgi" Rusiye devlet malümat sistemasınıñ portalında bu aqqında aytıla.
Alıcı, 100 biñ ruble miqdarında nizam kapitalınen 2021 senesi qayd etilgen "Perspektiva" sport inkişafı merkezi" Moskvanıñ sıñırlı şirketi oldı. Şirket sport ve mesken obyektleriniñ qurucılığında ihtisaslaşqan. "Perspektiva"nıñ saibi Oksana Gusakova ola.
"Torgi" portalında, limannıñ topraq damartısı 6,45 gektarnı teşkil etkenini qayd eteler. İlk küz ayınıñ 30-nda müessisede doquz hadim çalışa edi.
Evel Yevpatoriya (Kezlev) ve Yalta limanlarınıñ aktsiyalarını Qırım Mülkiyet ve topraq munasebetleri nazirligi auktsionğa qoydı. Yevpatoriya (KEzlev) limanı içün auktsion yazda keçirilecek edi, amma onı lâğu ettiler.
Satıştan evel liman ğayrıdan teşkil etildi, "Qırım deñiz limanları" şirketinden çıqarıldı ve aktsioner cemiyetine çevirildi.
2014 senesi "milliyleştirilgen" soñ Qırım limanları "Qırım deñiz limanları" şirketiniñ balansına berildi.
Hatırlatamız ki, işğalciler Qırımda "sadıq olmağan sakinler"ge basqı usullarından biri olaraq şahsiy mülkiyet obyektleriniñ qanunsız "milliyleştirilüvi"ni qullanalar. Umumen işğalli memuriyet eki yıl içinde tahminen 3,5 biñ mülkiyet obyektini "milliyleştirdi", olardan 1,2 biñ-i — 2024 senesi, dep çiçek ayında "QırımSOS" cemaat teşkilâtı bildirdi.
2024 senesi işğal etilgen mal-mülkniñ satıluvından yarımadanıñ işğalli akimiyeti 4,4 mlrd ruble (1,2 mlrd ğrıvnâ) aldı, dep Ukrayina prezidentiniñ Qırım Muhtar Cumhuriyetindeki daimiy temsilcisiniñ muavini Denıs Çıstikov bildirdi.
"Ukrayinalı olmaq yeter. Rusiye Federatsiyası mülküni "milliyleştirüv" dep, onı tutıp ala" materialında Suspilne Qırım jurnalistleri uquqçılarnen laf etip, işğalciler yarımadada mülküni zapt etkende ne yapmaq kerek olğanını añlattılar.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
