RF Mudafaa nazirligi ilk qış ayınıñ 16-nda gece işğal etilgen Qırım üzerinde Rusiye ava mudafaası quvetleri tarafından eki uçucısız uçaq aleti yoq etilgeni aqqında bildirdi.
Rusiye mudafaa nazirligi Telegram kanalında bunı bildirdi.
Anda qayd etildi ki, umumen bir gecede Rusiye toprağında 83 dron uruldı, olardan çoqusı (64-ü) — Brânsk vilâyeti üzerinde.
Hatırlatamız ki, UHH Arbiy deñiz quvetlerinen beraberlikte, Novorossiysk limanında kritik zarar körgen ve kerçekten bozulğan Rusiye suvastı gemisini urdı. Tarihta ilk sefer "Sub Sea Baby" suvastı dronları 636.3 sınıflı "Varshavânka" suvastı gemisini urdı, dep UHH bildirdi.
Daa evel Ukrayina Mudafaa nazirliginiñ Baş istihbarat idaresi ilk qış ayınıñ 13-nde Qırımdaki S-400 "Triumf" zıddiyet-raketa kompleksine kirgen eki qıymetli RLS sisteması olğan 39N6 "Kasta-2E2" ve 96L6 RLS zarar körgenini kösterdi.
Bundan evel Mahsus operatsiyalar quvetleri ilk qış ayınıñ 14-ne keçer gecesi işğal etilgen Qırımda uçucısız uçaq aletlerinden ücüm etilgenini bildirdi. Şu cümleden, Bitumnedeki (Simferopol rayonı) neft bazasınıñ ve Yantarnıy (Qurman rayonı) civarında areket etken yaqarlıqnen trenniñ zarar körgen videoları derc etildi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
