Ukrayina qavmiy siyaset ve vicdan serbestligi devlet hızmeti (QSVSDH) göñüllilerni devlet mukâfatınen taqdirledi, olardan doquzı — qırımtatarlar. Olar köçip kelgenlerge yardım eteler, farqlı dinlerge mensüp cemiyetlerge qol tutalar, cebedeki ayat qurtaralar ve halqınıñ medeniyetini saqlaylar.
İlk qış ayınıñ 5-nde, Göñülli kününe, QSVSDH bu aqqnda haber etti.
QSVSDHniñ başı Viktor Yelenskıy, fedakârlıqları içün teşekkür bildirip, kerçek yardım sevgi ve qayğıdan peyda olğanını qayd etti.
Qırımtatar faalcileri arasında:
- Feliks Karayev — "Qırım cebesi"niñ koordinatorı ola, bütün Ukrayinadaki köçip kelgenlerge ve cemiyetlerge qol tuta. Ukrayina prezidentiniñ "Ukrayinanı mudafaa etkeni içün" nişanınen taqdirlendi.
- Elvina Seitbullayeva — cebege yaqın ve işğalden azat etilgen topraqlarğa gumanitar yardımnı ketirgen, reanimatsiya maşnalarınıñ berilmesini teşkil etken göñülli. Şerefli mukâfatnen taqdirlendi.
- Lenur Mambetov — "Qırım cebesi"niñ koordinatorı ve Qırım milliy varlıq fondınıñ reisi. Cenk başlağanından berli adamlarnı çetelge tahliye ete, arbiy tehnika ve generatorlarnen yardım ete edi. Yuqarı mukâfatnen taqdirlengen.
- Edem Mamutov — ordu komandanı ve tibbiyetçisidir, tolu miqyaslı istilânıñ ilk künlerinden öz batalyonınıñ ayatlarını qurtarıp temin ete. Ukrayina prezidentiniñ "Ukrayinanı mudafaa etkeni içün" mukâfatını aldı.
- Nariman Bayramov — 2022 senesi Herson vilâyetiniñ işğal etilgen Geniçeskteki mitinglerge çıqqan imam. "Memleketke aş bereyik. Ukrayinanıñ Qırım tadı" kitabı ukrayinlerni qırımtatar aşlarınen tanış ete. Yuqarı mukâfatnen taqdirlengen.
Aynı zamanda Qırımtatar resurs merkezi qayd etti ki, dört göñülli ilk qış ayınıñ 2-nde keçirilgen birinci Ukrayina tamır halqları kongressinde mukâfat aldı. Olarnıñ arasında:
- Snaver Seithalilev — "Qırım cebesi"niñ koordinatorı, cenkniñ ilk aylarından itibaren arbiy hızmetçilerge, vatandaşlarğa ve köçip kelgenlerge yardım ete. Bölüklerni silâ, tehnika ve gumanitar yüklernen temin ete, içtimaiy ceetten zayıf olğan qorantalarğa qol tuta, hastahaneler ve göñülli merkezlernen işbirlik tuta.
- Emine Emirsaliyeva — cenk başlağanından berli işğalden zarar körgen arbiy hızmetçilerge, vatandaşlarğa ve qorantalarğa qol tutqan göñülli. O, cenk alanlarına barıp, köçip kelgenlerge ve içtimaiy ceetten zayıf olğan insanlarğa yardım ete, ilâc ve donatmalarnı bere.
- Üsein Bekirov — arbiy hızmetçiler ve vatandaşlarğa faal destek köstergen bir göñülli. O, bölüklerni silâ ve tehnikanen temin ete, devlet içinde alınğan qorantalar ve esli-başlı insanlarnı baqa, gumanitar toplaşuvlar ve qırımlılarğa qol tutuv leyhalarını idare ete.
- Edem Basnaev — cemaatına yardım etmek içün işğal etilgen topraqlarda qalğan imam ve göñülli. Aileler, qartlar ve köçip kelgenlerge yardım ete, ruhiy destek bere edi. Tahliye etilgen soñ, Kıyiv vilâyetinde göñülli faaliyetini devam etti.
Читати ще
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
