İşğal etilgen Sevastopol (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad) akimiyeti eñ büyük yerli “Sevstar” provayderlerinden birini milliyleştirdi. Sebebi "şirketniñ saibi oğlunıñ ukrayin istihbaratınen alâqaları" ve "Ukrayinağa maliyeviy yardım" oldı.
İşğalli şeerniñ gubernatorı Mihail Razvojayev bunı bildirdi.
Onıñ aytqanına köre, qarar "şirketniñ eñ büyük aktsionerlerinden biriniñ qorantasınıñ Ukrayina Mudafaa nazirliginiñ Baş istihbarat idaresi ile alâqaları"nen bağlı.
“Malüm olğanı kibi, Oleksiy Kantsebovskıy Ukrayina mudafaa nazirliginiñ Bİİe muracaat etip, olarğa yardım etmege azır olğanını bildirdi, em de kriptopara yollap, çetel mahsus hızmetlerine maliyeviy destek köstergen edi. Kantsebovskıynıñ anası — Larısa Kantsebovska — "Sevstar MT" şirketiniñ 71,45% qısmınıñ esas müdiri ve qurucısı ola, em de "Sevstar" brendi altında diger şirketlerniñ müdiridir", — dep Razvojayev bildirdi.
O şunı da qayd etti ki, saipleri "USQ ve ukrayin istihbaratına yardım etken" diger şirketlernen bağlı iş devam ete, hususan "Sevastopolgaz" ile bağlı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
