"Ateş" arbiy-partizan areketiniñ agentleri işğal etilgen Qırımda Rusiye Qara deñiz flotunıñ Simferopoldaki (AqmescitRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki adteki) 744-ünci bağ merkeziniñ foto ve videolarını çektiler.
Areket Telegramda bunı bildirdi.
"Ateş"niñ malümatına köre, işğalli quvetler yarımadada ve Qara deñizde öz bölükleriniñ areketlerini bağlamaq ve idare etmek içün bu merkezni qullanalar.
Agentlerniñ bildirgenlerine köre, teşkerüv devamında merkezniñ kritik qısımlarınıñ tam yeri belgilendi, şu cümleden, bağ qulleleri, antenna noqtaları, tehnikanen anbarlar ve mobil ağlarnıñ tarqalmasını temin etken hızmet maşinaları.
"Bu bağ merkeziniñ yoq etilmesi Rusiye işğalli ordularınıñ idare etüv ve koordinatsiya sistemasını felç ete, olarnı "kör" ve "sağır" yapa. Onıñ içün bu arbiy bölük Ukrayina Mudafaa quvetleri içün prioritetli maqsat ola", — dep haberde qayd etildi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
