İşğalli uquq qorçalayıcılar işğal etilgen Bağçasarayda yaşağan 74 yaşındaki tarihçı Enver Seitmemetovğa qarşı memuriy protokol tizdiler. İşğalciler, "ŞSCB ve natsist Almaniyasınıñ areketlerine qarşılıq kösterüv" maddesine istinaden qabaatlavnı bildirdiler. İşğalli "mahkeme" oturışnı ilk qış ayınıñ 2-ne qaldırdı.
"Qırım birdemligi" bunı bildirdi.
Boş aynıñ 25-nde saba Bağçasarayda Enver Seitmemetovnıñ evine tahminen 10 işğalli quvetçi keldi. Olar oña qararnı oqudılar ve Simferopolğa (AqmescitRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki adke) — Aşırıcılıqnen küreş merkezine alıp kettiler.
"O yerde "E" Merkeziniñ baş vekâletlisi Seitmemetovnıñ memuriy protokolını tizdi, boş aynıñ 20-nde polis hadimi "Qırım birdemligi" saifesinde 2020 senesi mayısnıñ 18-nde derc etilgen video repostını taptı. Videonı bu sene mayıs ayınıñ 18-nde tekrar yerleştirdiler ve mayıs ayınıñ 18-ne — 1944 senesi qırımtatarlarnıñ Qırımdan sürgünligi yıllığına bağışladılar", — dep "Qırım birdemligi" yazdı.
"Halqara toplulıq ya da bugün aqlarnıñ bozulğanını aytqanlar Birleşken Milletler Teşkilâtı, 1948 senesi insan aqları aqqında qanunlarnı qabul eteler — asılında bu qanunlar çalışmay. Tek Nürnberg davası degil de... Men bellesem, aynı ğaliplerni mahküm etecek başqa bir halqara mahkeme olmalı", — dep Enver Seitmemetov videoda ayttı.
Boş ayınıñ 24-nde "netice"ni azırlağan işğalli "mütehassıs" O.V. Romanko dey ki, intervyuda Seitmemetov "ŞSCB reberliginiñ qırımtatar, yunan ve digerlerni 1944 senesi mayıs ayında mecburen sürgün etüvnen bağlı areketlerini natsist Almaniyasınıñ reberliginiñ cinayetlerinen teñ saya".
Tarihçı Aşırıcılıqqa qarşı küreş merkezinde yazılı izaat bermekten vazgeçti, ve protokol tizilgen vaqıt onıñ imayecisi yoq edi.
Soñra adamnı işğal etilgen Simferopoldaki (Aqmescitteki) mahkeme bölügine alıp kettiler. Onıñ davası mahkemeci Sergey Moskalenkoğa berildi, o, baqmağa başladı, amma mahkeme esnasında oturışnı ilk qış ayınıñ 2-ne qaldırdı. Enver Seitmemetovnı yiberdiler.
"Bu, qırımtatar cemiyetiniñ vekiliniñ açıq ifadeleri içün mesüliyetke çekilgeniniñ ilk vaqiası degil. Böylece, 2024 senesi mahkeme advokat Emil Kurbedinovğa 30 biñ ruble (tahminen 15 biñ ğrıvnâ — muar.) para cezasını berdi", — dep "Qırım birdemligi" yazdı.
Hatırlatamız ki, 74 yaşındaki tarihçı Enver Seitmemetov — üç siyasiy mabüs Seitumer, Osman ve Abdulmecit Seitumerovnıñ dayısıdır.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
