Salı künü, boş aynıñ 25-nde, işğalli "Qırım parlamenti"niñ mebusları birinci oquvda 2026 senesiniñ büceti, 2027 ve 2028 seneleri içün plan leyhasını qabul ettiler. Vesiqada 3,9 milliard rublelik (≈ 2 milliard ğrıvnâ — muar.) eksiklik tahmin etilgen edi. İşğalli Qırım hazinesini tölemeniñ esas yolu — artacaq bergi olacaq.
RİA"Novosti Krım" bu aqqında yazdı.
İşğalcilerniñ malümatına köre, 2026 senesine Qırımnıñ kelirleri 231,1 milliard ruble (≈ 116 milliard ğrıvnâ — muar.) seviyesinde beklenile, masraflar ise daa çoq — 235 milliard ruble (≈ 118 milliard ğrıvnâ — muar.) planlaştırılğan edi.
"3,9 milliard rublelik (≈ 2 milliard ğrıvnâ — muar.) eksiklik esaplarda qalğan para, aktsiyalarnıñ satıluvı ve sermiyada iştirak etüvniñ diger şekilleri, federal bücetten kreditlerniñ celp etilmesi ile qapatılacaq", — dep "Qırım vitse baş naziri" İrina Kiviko bildirdi.
Onıñ aytqanına köre, kelecek sene işğalli akimiyetke kelgen paranıñ aman-aman yarısı — tahminen 120 milliard ruble (≈ 60 milliard ğrıvnâ — muar..) — bergi ve bergi olmağan kelirlerden ibaret olacaq, olarnıñ çoqusı — şahsiy kelir ve teşkilâtlarnıñ kâr vergisi.
İşğalli "Qırım parlamenti"niñ reisi Vladimir Kontantinov Telegramda yazğanına köre, işğal yılları Qırımda bergi toplavı 10 qat arttı.
"Qayd etem ki, 2014 senesinden başlap Qırımnıñ bergi ve bergi olmağan kelirleri 10 qat arttı — 11,8 milliard rubleden (≈ 6 milliard ğrıvnâ — muar.) 119,9 milliard rublege (qararnen 60 milliard ğrıvnâ — muar.) qadar", — dep Konstantinov qayd etti.
Rusiyede 2026 senesi qara qış ayınıñ 1-nden itibaren qoşma qıymet bergi (QQB) 20 fayızdan 22 fayızğa köterilecek, dep boş aynıñ 28-nde Rusiye Devlet dumasınıñ toplaşuv neticelerine esaslanıp, "The Moscow Times" Rusiye hızmeti yazdı. Böyleliknen rusiyeliler Rusiye bücetine qoşma 1,2 trillion ruble (qararnen 600 milliard ğrıvnâ — muar.) celp etmege planlaştıralar.
"Aynı vaqıtta, biznes içün para cezaları 1,5-3 qat artacaq, gümrük ödemeleri ise 1,5-10 qat artacaq. Vatandaş ve şirketlerden para cezalarınıñ toplamı 1,5 qat arttı — yılda 300 milliard rublege (≈ 150 milliard ğrıvnâ — muar.) qadar", — dep neşir yazdı.
Bergilerden ğayrı, Rusiyede bergi tölemegeni içün para cezaları da kirsetile bile, dep Ukrayina tış istihbarat hızmeti bildirdi.
"Rusiye ükümeti, qanunsız teşebbüslerden başlap, bergi tölemegeni qadar iqtisadiy bozuvlar içün para cezalarınıñ arttırılmasına azırlana. Teşebbüsniñ formal olaraq maqsadı "cezanıñ semereliligini arttırmaq", lâkin kerçek maqsadı açıq-aydın — tükenkenken bücetni toldurmaq", — dep istihbarat bildirdi.
Deñişmeler, amelge keçirilse, 36 iqtisadiy cinayetni qaplap ala bilir, para cezaları ise bir qaç qat artacaq.
"Qanunsız teşebbüs içün 18,5 biñ dollar (≈ 777 biñ ğrıvnâ — muar.) miqdarında cöremeler teklif etile, şimdiki vaziyetke köre 4 biñ dollar (≈ 168 biñ ğrıvnâ — muar.), "ayrıca büyük" zararlar içün ise — 6 biñ dollar (≈ 1,3 million ğrıvnâ — muar.) miqdarında 31 biñ dollar (≈ 252 biñ ğrıvnâ — muar.). Niyetli bankrotlıq içün para cezası 6 yerine 25 biñ AQŞ dolları olacaq, bergi tölememek içün ise 6 biñden 18,5 dollarğa qadar olacaq. Bundan da ğayrı, "büyük" ve "ayrıca büyük" zarar kriteriyleriniñ ğayrıdan baqılması planlaştırıla, bu ise cinayetniñ terkibini daa keniş añlamağa imkân berecek ve, bunıñnen beraber, sıq-sıq eñ yüksek sanktsiyalarnı qullanmağa imkân berecek", — dep SZRU añlattı.
"Açuvlı Mavka" işğalge qarşılıq köstergen qadın areketiniñ temsilcileri boş aynıñ 13-nde öz Telegramında bildirdiler ki, yarımadada yañıdan çıqarılğan aydavcı ruhsetnamesi içün bergi fiyatı bayağı arttı, bazıda eki qat arttı.
"Sırada turğan qıznen laf ettim. O, vesiqalarnı vaqtında resmiyleştirmedi, ve şimdi yañı tarif boyunca uquq içün devlet bergisini tölemege mecbur oldı. Şimdi ise er kesniñ yañılaşması kerek. İlk küz ayında bu vesiqalar 2000 ruble (≈ 1 biñ ğrıvnâ — muar.), orta küz ayında ise — 4 biñ (≈ 2 biñ ğrıvnâ — muar.). Menim vaziyetim de aynı: devlet hızmetleriniñ saytında, vesiqalarım 2,5 biñ ruble (≈ 1300 ğrn. — muar.) tura, dep yazılğan, amma tölemege keçkende — endi 4500 (≈ 2300 ğrn. — muar.). Saytnıñ metnini deñiştirmege vaqıtları olmadı. Biz külüştik, Rusiyede eñ tez inkişaf etken ve eñ ileri ketken "vergi toplama" saası aqqında zarafatlar ayttıq", — dep yazıda qayd etildi.
İşğal etilgen Sevastopolda (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki adda) "mebuslar" naqliyat bergi artmasını teklif eteler, bazı maşinalar içün — 60%-ge qadar. Keçken afta işğalli "Sevastopol parlamenti"niñ baqıluvına qanun leyhası kirsetildi, dep "Sevastopol ForPost haber hızmeti" yazdı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
