"Hizb ut-Tahrir davası"nıñ birinci Simferopol (AqmescitRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad) gruppasınıñ figurantı, Qırımtatar Ayder Saledinov, onı işğalciler Qırımda 11 yıl ve 6 ay apis cezasına mahküm ettiler, bir yılğa sert tutuv şaraitlerinde baraklarğa yerleştirildi. Bundan evel o, bir buçuq aydan ziyade ceza izolâtorında (ŞİZO) edi.
Onıñ apayı Güzal Suleyman-Zade "Qırım birdemligi" cemaat teşkilâtına boş aynıñ 20-nde bu aqqında ikâye etti.
O, Rusiye Federatsiyasınıñ Başqırstan vilâyetindeki Salavatnıñ №2 apishanesinde bulunğan qırımtatarnı ziyaret etti. İlk küz ayınıñ başından berli onı bir ay 20 kün devamında ŞİZOda tuttılar. Adamnıñ izolâtorda tutulğanı aqqında ilk küz ayınıñ soñunda belli oldı.
Suleyman-Zadeniñ aytqanına köre, 15 künden soñ, Saladinov yañı cezalarğa oğradı, hususan namaz qılğanı içün.
Nezaretçiler, qadınğa, bir yıl devamında bir de bir bozuv olmağan taqdirde, umumiy barakka qaytmaq mümkün olğanını ayttılar.
"Bu areketlerniñ sebebi belli degil. Advokatlar hadimge bunı añlatmağa rica etkende, oña böyle dediler: "Baqıñız, bu yerde sebep tapmaq qolay. Meselâ, selâmlaşmadım (koloniya hadimleri ile — muar.), er kesnen selâmlaşmadım, yataqlarnı keregi kibi tertip etmedim ve ilâhre", — o dedi.
Siyasiy mabüsniñ qadını bildirgenine köre, ŞİZOda bulunğan vaqtında Saledinovnıñ hronik hastalıqları kerginleşti: tonsillit, böyrek ve oynaq problemleri.
Koloniyada tedaviylev paratsetamolnen sıñırlana ve tek yüksek sıcaq olsa, çalışmamağa izin berile. Şimdi o, dikiş maşnasında çalışa, ve kerekli ilâclarnı aqrabalarından ala.
Bundan da ğayrı, koloniya issiliknen bağlı problemlerge rastkele: küzniñ soñunda qızdırıcılar açıla ve baarniñ başında söndürile, dep Suleyman-Zade qayd etti. Başqırstannıñ suvuq ikliminde bu, mabüslerniñ buzlap qalmasına ketire.
Hatırlatamız, boş ayına qadar Rusiyeniñ serbest olmağan yerlerinde ve işğal etilgen Qırımda eñ az 312 qırımlı siyasiy mabüs buluna, olardan 174 — qırımtatarı, dep bildirdi Qırımtatar resurs merkeziniñ reisi Eskender Bariyev.
"Hizb ut-Tahrir davası"nıñ birinci Aqmescit gruppası aqqında ne bilemiz
2016 senesi orta küz ayınıñ 2-nde Aqmescit rayonınıñ Kamyanka ve Stroğanivka mikrorayonlarında kütleviy tintüvler keçirildi. Beş adam tutuldı ve Rusiyede yasaq etilgen "Hizb ut-Tahrir" islâm siyasiy firqasınıñ faaliyetinde qabaatlanğan edi.
2019 senesi bozarğan ayda Rostov-na-Donu Cenübiy bölgeniñ arbiy makemesi "Hizb ut-Tahrir davası"nıñ birinci Aqmescit gruppasınıñ mabüslerini: Teymur Abdullayev sert rejimli müstemelekede 17 senege, Uzeyir Abdullayev 13 senege, Rustem İsmailov 14 senege, Ayder Salidenov ve Emil Cemadenov 12 senege maküm etti.
2019 senesi ilk qış ayınıñ 24-nde Rusiye Yuqarı makemesi mabüslerniñ ükümlerini 6 ayğa qısqartıp, deñiştirdi. Böyleliknen, Teymur Abdullayev 16 sene 6 ay apis cezasına ve 1 sene 4 aylıq memuriy nezaret cezasına maküm etildi, Uzeyir Abdullayev 12 sene 6 ayğa, Rustem İsmailov 13 sene 6 ayğa, Emil Cemadenov 11 sene 6 ayğa, Ayder Salidenov 11 sene 6 ayğa apis cezasına maküm etildi.
Hizb ut-Tahrir, islâm siyasiy fırqasıdır. 2003 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, "qanunlarğa qarşı faaliyet"te ve böyle degen "cian hilâfeti"ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
