İşğalciler, Ukrayina vatandaşlarınıñ mal-mülkiniñ "milliyleştirilmesinden" elde etilgen 6,9 milliard rubleni işğal etilgen Qırımda leyhalarnıñ ömürge keçirilmesine yöneltkenini bildirdiler.
Qırımnıñ işğalci yolbaşçısı Sergey Aksönov bu aqqında bildirdi.
Onıñ aytqanına köre, bu, meskün yerler, müessiseler, suv ağları.
O, 6,9 milliard rubleni ne vaqıt alğanını aytmadı.
Hatırlatamız, 2025 senesiniñ ilk altı ayı devamında Qırımnıñ işğalci akimiyeti, keçken senelerde Rusiye kontrolindeki memuriyet tarafından "milliyleştirilgen" ve hırsızlanğan 25 obyektni 2,2 mlrd rubleden (660 biñ ğrıvna) ziyade sattı, dep bildirdi "işğalci" Qırım parlamentiniñ reisi Volodımır Konstantınov öz Telegram kanalında oraq ayınıñ 15-nde.
Qırımnıñ Rusiye işğalci akimiyeti "namusız sakinlerge" basqı usullarından biri olaraq şahsiy mülkiyet obyektleriniñ qanunsız "milliyleştirilüvi"ni qullana. Umumen işğalci memuriyet eki yıl içinde tahminen 3,5 biñ mülkiyet obyektini "milliyleştirdi", olardan 1,2 biñ - 2024 senesi, dep bildirdi çiçek ayında "QırımSOS" cemaat teşkilâtı.
2024 senesi işğal etilgen mal-mülkniñ satıluvından yarımadanıñ işğalci akimiyeti 4,4 mlrd ruble (1,2 mlrd ğrıvna) aldı, dep bildirdi Ukrayina prezidentiniñ Qırım Muhtar Cumhuriyetindeki daimiy temsilcisiniñ muavini Denıs Çistikov.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
