İşğal etilgen Qırımda FSBRFnıñ Federal havfsızlıq hızmeti işğalli "Simferopol ve Qırım mitropoliti" Tihonğa qarşı yapılğan ücüm davası çerçivesinde tintüvler keçirdi. Rusiye quvetçileri yañı mabüslerni sorğuğa çekken videolarda ukrayin milliy timsallerini köstereler. Bundan ğayrı, FSBniñ tintüvleri Moskvada ve Pskov vilâyetinde keçti.
Qırımdaki tutuvlarnıñ videosını RİA "Novosti Krım" derc etti. Tintüv tafsilâtları aqqında Rusiye FSBsiniñ matbuat hızmeti bildirdi.
"2025 senesi boş aynıñ 11-nde Moskva şeerinde, Pskov vilâyetinde ve Qırım Cumhuriyetinde taqiqat organları tarafından cinaiy davanıñ tahqiqatı devamında dava mabüsleriniñ yaqınları tintildi ve sorğuğa çekildi. D.Y. Popovıç ve M.S. İvankovıçnıñ qabaatlanğan cinayetlerge alâqası bar olğanına dair deliller tapıldı. Rusiyede yasaq etilgen terror teşkilâtınıñ teşviqat timsalleri çıqarıldı. Tedbirler neticesinde bu cinayetke diger şahıslarnıñ alâqası aqqında malümat elde etildi", — dep FSBniñ haberinde qayd etildi.
Rusiye mahsus hızmetleri bu "adamlar" kim olğanlarını, olarnıñ alâqası ne ve statusı ne olğanını bildirmedi. "Terror teşkilâtı" ne olğanı daa belli degil. Derc etilgen videoda "Ukrayinağa şan-şeref, Qaramanlarğa şan-şeref!" şiarlarınen mavı-sarı ve qırmızı-qara şeritler bar.
Hatırlatamız ki, 2025 senesi kiçik ayda "Mitropolit Tihonğa ücüm davası" boyunca mitropolitniñ yardımcısı Denıs Popovıç ve kâtibi Mıkıta İvankovıç tutuldı. O vaqıt FSB bildirdi ki, terakt "Ukrauina mahsus hızmetleriniñ vazifesinen" azırlanğan edi, şübheliler ise "Moskvadaki Sretenskiy manastırında bomba patlatmaq, soñ ise Ukrayina vesiqalarınen Rusiyeden çıqmaq" kerek ediler.
Rusiye quvetçileri, işğalli mitropolit Tihonnı öldürmekniñ maqsadı "Rusiye ve AQŞ arasında muzakerelerni bozmaq" olğanını iddia ete.
"Mütehassıslarnıñ fikirince, qayd etilgen diversiya-terroristik areketiniñ esas maqsadı, Ukrayina zıddiyetiniñ al etilmesi boyunca Rusiye ve AQŞ arasında muzakerelerni bozmaq edi", — dep FSB qayd etti.
FSBniñ matbuat hızmetiniñ bildirgenine köre, qabaatlanğanlar qabaatını tanıdılar. Amma mahkemede olar sorğu vaqtında, şu cümleden elektrik aqımınen, azaplanğanlarını ve qabaatlarını inkâr etkenlerini bildirdiler.
Mıkıta İvankovıçnıñ aytqanına köre, apiske alınğanda evinde keçirilgen tintüv vaqtında, tahqiqatnıñ versiyasına köre, Moskvanıñ Terletskıy parkında saqlanğan yerde patlayıcı alet qoyğanı bir kürek tapıldı. Onıñ aytqanına köre, o, bu kürekni ilk sefer kördi — davağa "delil" olğan diger şeylerni kibi.
Popovıçnıñ aytqanına köre, tahqiqat vaqtında tek oña degil de, yaqınlarına da qorquzuvlar yapıldı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
