Ukrayina mahkemesi 2014 senesi çiçek ayında Rusiye akimiyetine keçken Qırım Muhtar Cumhuriyeti prokurorlığınıñ sabıq prokurorını devlet hainligiUkrayina CQniñ 111-nci maddesiniñ 1-nci, 2-nci qısımları içün 15 yılğa mahküm etti ve mülküni müsadere etti.
Boş aynıñ 4-nde Ukrayina Baş prokurorınıñ ofisi bunı bildirdi.
Müessiseniñ malümatına köre, 2018 senesinden berli mahküm etilgen işğalli Qırım prokurorlığında reberlik vazifelerini eda ete edi.
"O, öz vazifelerini eda ete edi, hadimleriniñ faaliyetini teşkil ete ve nezaret ete edi, qanunsız şekilde qurulğan Rusiye uquq qorçalayıcı organlarınıñ bölükleriniñ işini idare ete edi", — dep haberde bildirildi.
Daa evel Ukrayinada Sevastopol (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad) şeer şurasınıñ daa bir "mebusı" devlet hainligi içün 11 yılğa ğıyabiy şekilde mahküm etildi. 2014 senesi işğalli akimiyetnen işbirlikke kirdi.
Bundan da ğayrı, Ukrayinada 15 yıllıq apis cezasına, işğal etilgen Qırımda "Feodosiya bölgesi kazakları birligi" qanunsız silâlı birleşmesiniñ "sefer otamanı" da ğıyabiy şekilde mahküm etildi.
Qırım MC ve Sevastopol (Aqyar) şeeri prokurorlığı Suspilne Qırımğa añlattı ki, qabatalanğan adam olmadan mahsus makeme oturışları ("ğıyabiy ükümler") neticesinde çıqarılğan ükümler umumiy şekilde aqqını qazanalar. Yani apellâtsiya şikâyetnamesi berilmese, apellâtsiya şikâyetnamesini berüv müddeti (üküm çıqarılğan 30 kün soñ) bitecek soñ aqqını qazanır.
Apellâtsiya şikâyetnamesi berilse ve lâğu etilmese, apellâtsiya makemesi qarar alacaq soñ üküm aqqını qazana. Aynı zamanda adam tutulğan vaqıttan berli ceza müddeti başlap sayıla.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
