Rusiye işğal etilgen Qırımda Telegram ve WhatsApp mesaclarınıñ işini qısmen sıñırladı. "Volna" bölge operatorınıñ malümatına köre, blok etüv Roskomnadzor tarafından yapıla.
RİA "Novosti", "Volna" bölge operatorınıñ matbuat hızmetine esaslanıp, bunı bildirdi.
Rusiye neşiriniñ bildirgenine köre, Roskomnadzor Telegram ve WhatsAppnıñ işini blok ete. Bunıñ yerine Rusiye işğal etilgen Qırım sakinlerine Max messencerini yüklemege teklif ete.
"Qırımda Telegram ve WhatsAppnıñ işi qısmen sıñırlandı. Bu qullanımlarnı blok etüv tedbirleri Roskomnadzor tarafından keçirile, bu bütün Rusiye operatorları ve provayderleriniñ müşterilerine aittir. Qırım haber nazirligi sakinlerge Max messencerini yüklemege tevsiye ete, mında yarımadanıñ müim media kanalları, devlet yayınları ve diger haber resursları, şu cümleden "Volna" bağ operatorınıñ kanalı bar", — dep bildirildi.
Daa evel Roskomnadzorda, Rusiyeniñ cenübinde ve işğal etilgen Qırımda messencerlerniñ işi toqtatılğanınıñ sebebini izaatlap, "RİA Novosti" agentligine bildirdiler ki, müessise Telegram ve WhatsAppnıñ işini sıñırlay, "olar sahtekârlıq ve para talap etüvge, em de rusiyelilerni diversiya ve terroristik faaliyetke celp etüvge doğrultılğan cinaiy areketlerge qarşılıq köstermek içün".
Hatırlatamız ki, orta küz ayınıñ 29-nda işğal etilgen Qırımda Telegram messencerinde büyük bir bozuluv oldı. Bundan da ğayrı, Rusiyeniñ bütün topraqlarında ilâvenen bağlı meseleler aqqında haber etile edi.
2025 senesi ilk küz ayınıñ 1-den itibaren Rusiyede ve vaqtınca işğal etilgen Ukrayina topraqlarında, hususan Qırımda, yañı Max Rusiye messenceriniñ qullanılması mecburiy olacaqtır. Onı Kreml ve FSB kontrol etken VK şirketi azırladı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
