Orta küz ayınıñ 20-nde Avropa insan aqları mahkemesi, işğalli Qırım akimiyeti tarafından 2016 senesinde kirsetilgen Qırımtatar Milliy Meclisiniñ yasaq etilmesi boyunca davalarda resmen muracaat etip başladı. Mahkeme muracaatlarını em qırımtatarlarnıñ temsil organları, em de ayrı vatandaşlar berdiler.
Qırımtatar resurs merkezi bunı bildirdi.
QRMniñ reisi, Meclis azası Eskender Bariiev qayd etti ki, 2017 senesinde QRMniñ yardımınen Avropa mahkemesine şahıslardan, Herson bölge meclisinden ve onıñ yerli meclislerinden, em de qırımtatarlarnıñ diger öz-özüni idare etüv organlarından 17 ayrı ariza berildi. 2017 senesi Helsinki Ukrayin insan aqları birliginiñ desteginen Meclis tarafından ayrı ariza berildi.
"Sekiz yıl keçken soñ, bu davalar bu sene faalleşip başladı. Mahkeme oturışınıñ bu qadar beklenilüvi, mahkemeniñ ayrı davalarnı tek keçken sene ilk yaz ayında çıqarılğan Qırımnen bağlı "Ukrayina Rusiyege qarşı" devletlerara davalarınıñ baqılmasından soñ baqılacağınen bağlıdır", — dep qayd etti o.
Bariiev qayd etti ki, şikâyetlerniñ maqsadı — ayrı teşkilâtnıñ yasaq etilmesi degil de, tamır qırımtatar halqına qarşı sistematik basqınıñ tanılmasıdır. Onıñ qayd etkenine köre, bu Kremlniñ genotsid siyaseti ve qırımtatarlarnıñ öz-özüni idare etüv sistemasını yoq etmek ıntıluvıdır.
2025 senesiniñ yazında QRM Avropa mahkemesine Herson bölge ve yerli meclisleriniñ vekilleriniñ taqip etilüvine dair qoşma malümat berdi. Azalarnıñ bir qısmı apiste buluna, digerleri basqı ve işkenceden çıqıp kettiler, qalğanları ise işğalli akimiyetniñ daimiy nezareti altında yaşay.
Arizacılarnı mahkemede advokat Borıs Babin temsil ete. O, muracaat etkenlerniñ statusını tamır halqlarınıñ aqları ceetinde belgilemek qıyın olğanını qayd etti.
"Menimce, eñ dramatik meseleler Herson vilâyetiniñ yerli meclisleriniñ işleri oldı, olar 2017 senesi Avropa mahkemesine Rusiye Federatsiyasınıñ qıtaiy Ukrayinağa istilâsı ve 2022 senesinden başlap qırımtatarlarğa qarşı basqılar aqqında yazğan ediler", — dep o ayttı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
