İşğalciler Bağçasaray rayonından 21 yaşındaki Adil Apkelâmovnı qanunsız şekilde müstemlekede 3 yılğa üküm ettiler. İşğalci tahqiqatnıñ versiyasına köre, o, "Rusiyege qarşı zorbalıq areketlerine çağıruvlarnen Telegramda mesajlar derc etti".
TASS Rusiye devlet agentligi, Qırım FSBsine atfı etip, bunı bildirdi.
Adil Apkelemovnıñ qanunsız ükmü Rusiyeniñ Rostov-na-Donu şeerindeki "Cenübiy bölgeniñ arbiy mahkemesinde" ilân etildi.
"Mahkeme Bağçasaray rayonınıñ sakinini internette ekstremistik ve terroristik faaliyetke çağıruvlarda qabaatlı tanıp, umumiy rejimli tüzetüv müstemlekesinde üç yılğa üküm etti. Adam, ruslarnı öldürmege çağırğan edi", — dep haberde qayd etildi.
"Mahkeme qararı" boyunca qanunsız sürette mahküm etilgen Qırım sakini üç yıl devamında saytlarnıñ idareciliginen oğraşmaq aqqından marum etildi.
"2004 senesi doğğan Bağçasaray rayonınıñ sakini Apkelâmov Adil Narimanoviçke İnternet ağında aşırıcı ve terroristik faaliyetke çağıruvlar içün üküm çıqarıldı. Qayd etilgenine köre, mabüs, Telegram messencerinde esabını qullanıp, milliy belgisi — ruslar olğan bir gruppağa qarşı zorbalıq areketlerine çağıruvlar ile metinlerni derc etti", — dep TASS yazdı.
Adil Apkelâmovnıñ qanunsız yaqalanuvına Qırımtatar Resurs Merkezi cevap berdi.
"QRM qanunsız apiske alınuvını takbih ete ve Adil Apkelâmov ve diger Qrım siyasiy mabüsleriniñ azat etilmesini talap ete", — dep teşkilâtnıñ saytında qayd etildi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
