12 yıl apis cezasına mahküm etilip, Salavattaki 6-ncı tüzetüv müstemelekesinde ceza çekken qırımtatar uquq qorçalayıcısı Emir-Usein Kuku ciddiy sağlıq meselelerini çeke. Siyasiy mabüsniñ tizlerindeki yañı şişler bar, körme qabiliyeti zayıflaşa, yüregi ve büyreklerinen meseleleri bar, lâkin oña kerekli tibbiy yardım kösterilmey.
Onıñ apayı Meryem Kuku "Qırım birdemligi"ne bunı bildirdi.
Onıñ aytqanına köre, adamda hastalıqlarnıñ ilk alâmetleri müstemlekege ketmezden evel — Rostov-na-Donudaki SİZO-4-te peyda oldı. Soñ, ultrason testinden soñ, ekimler bu Baker kistası olğanını tüşündiler. O vaqıttan berli o, ep artıp, ağrı çektirgen edi, amma müstemlekede tekrar teşkerüvler yapılmadı.
"Emir-Useinniñ tizleri yaramaylaşqanı içün, bazı vaqıtları namaz qılıp olamay. Başqa iç bir yerde ve iç bir vaqıt teşkerüv ve tedaviylev yapılmadı. Antibiotik tedaviylev olaraq adlandırmaq mümkün degil", — dep Meryem Kuku tarif etti.
Bundan ğayrı, siyasiy mabüsniñ körüme qabiliyeti fenalaştı, yürek, büyrek meseleleri ve bel ağrısı peyda oldı.
"Bütün tireme-areket apparatı yaramay alda olğanını köstere", — dep uquq qorçalayıcınıñ apayı qoştı.
Keçenlerde Kuku anginanen hastalandı. Bir qaç kün devamında hastalıqnıñ ağırlığı sebebinden laf etip olamay, şiddetli öksürik ve yüksek sıcağı bar edi. Hastahane raatlıq künleri çalışmağanı sebebinden, hastalıq alâmetleri peyda olğan dört kün keçken soñ tedaviylev berildi. 2023 senesi oraq ayında Emir-Usein Ufa apishanesinde içekleri ameliyatından keçti.
"O, ameliyattan soñ ağır alda edi", — dep Meryem Kuku qayd etti.
Onıñ aytqanına köre, TM-16nıñ memuriyeti er vaqıt resmiy sebeplerni qullanıp, adamnı ŞİZOğa yerleştire: qabaatsızlıq, belginiñ yoqluğı ya da yataqnıñ temiz olmaması.
Sağlıq meselelerine ve ağır tutuv şaraitine baqmadan, uquq qorçalayıcı şikâyet etmey.
"O, özü aqqında çoq aytmay. Bularnı men ögrenmege tırışam", — dep apayı qoştı.
Emir-Usein Kuku aqqında ne bilemiz
2016 senesi kiçik aynıñ 11-nde Kukunıñ qorantasınıñ evine uquq qorçalayıcı organları ekinci kere kirdi ve tintti, soñ onı "Hizb ut-Tahrir" islâm siyasiy firqasınıñ faaliyetinde iştirak etkeninde qabaatlap tuttı.
2019 senesi boş aynıñ 12-nde Rostov-na-Donu şeerinde 12 yılğa mahküm etildi. 2020 senesi ilk yaz ayınıñ 25-nde Moskva vilâyetiniñ Vlasiha şeeri arbiy istinaf mahkemesi ükümni amelde qaldırdı. Emir-Usein Kukunı Başqırtistan Cumhuriyetiniñ Salavat şeerindeki 16-ncı müstelekege etap ettiler.
Hizb ut-Tahrir, islâm siyasiy fırqasıdır. 2003 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, "qanunlarğa qarşı faaliyet"te ve böyle degen "cian hilâfeti"ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
