Qırımda işğalciler işğal etilgen yarımadanıñ yalı boyu zonasını qanunsız sürette qurmağa devam eteler. İşğal etilgen Sevastopoldaki (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki addaki) Orlivka köyünde Qara deñiz yalısında çoq qatlı kompleks qurulğanı aqqında haber peyda oldı. Yerli sakinler qurucı plâjğa kirişni sıñırlaycağından qasevetlene.
Ukrayinada yasaq etilgen "Vkontakte" Rusiye içtimaiy ağında işğalli Sevastopol (Aqyar) devlet qurucılıq nezareti ve ekspertizası idaresiniñ matbuat hızmeti yañı qurucılıq aqqında malümatnı tarqattı.
Orlivka köyüniñ yalısında 4 ve 6 qatlı "Qum ve deñiz" adlı yañı qurucılıqta 223 daire 2027 senesine qadar qurulacağını vade eteler. İşğal etilgen Sevgosnadzornıñ bildirgenine köre, yañı qanunsız kompleks plâjğa yaqın yerleşecek ve 11 binadan ibaret olacaq.
"For Post" yerli Sevastopol neşiriniñ bildirgenine köre, keçken sene kompleks leyhası işğalli Sevastopol (Aqyar) mimarlıq-bediiy şurasınıñ azaları tarafından tasdıqlandı. Mütehassıslarnıñ sualleriniñ çoqusı mimarlıq qararlarına degil de, kommunal astyapı ve telükesizlikke bağlı edi. Şu cümleden, "şura" azalarını suv anbarlarınıñ yoqluğı ve kelecekte qurulacaq evlerniñ furtunalarğa dayanması qasevetlendire edi.
"Leyha mütehassısları, yalı kenarınıñ hususiyetleri köz ögüne alındı, dep işandıralar, ve binalarnı furtunalardan qorçalamaq içün, tahminen 1,8 metrlik yapma divar qurulacaq. Bundan ğayrı, kanalizatsiya qurulacağını vade eteler", — dep neşir yazdı.
Neşir şunı da qayd etti ki, plâj yanındaki kompleksniñ qurucılığı aqqında haber yerli ealige hoş kelmey. Hususan, olar qurucılıq sahiline kirişni sıñırlaycağından qasevetleneler.
Hatırlatamız ki, Yalta rayonınıñ işğal etilgen Simeizde ruslar Qara deñiz yalısında çoq qatlı daire kompleksini qurmağa planlaştıralar. Yerli eali, unikal tabiat ve tarihiy körünişniñ yoq etilüvi ve kommunal ağlarnıñ çoqlaşuvı sebebinden yalı boyu qurucılığına qarşı çıqa.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
