"The Late Show with Stephen Colbert" ("Stiven Kolbert ile keç şou") adlı amerika programmasında Ukrayinadaki cenk aqqında aytıldı, lâkin memleket haritasında işğal etilgen Qırım kösterilmedi.
İşğal etilgen Qırım yarımadası olmağan Ukrayina haritasınıñ videosı 2025 senesi ilk küz ayınıñ 9-nda Youtubede yayınlandı.
Youtubedeki video 200 biñden ziyade kere baqıldı. Bu, CBS telekanalında yayınlanğan bir şoudır.
Stiven Kolbert, "Late Show" leyhasında çalışqanınıñ 10 yıllığına bağışlanğan çıqışında, 2015 senesinden başlap amerikalılarnıñ yaşayışına tesir etken farqlı vaqialarnı hatırladı. Programmanıñ bir qısmını o, ukrayinlerniñ qaraman küreşini qayd etip, Ukrayinağa bağışladı. Faqat ekranda peyda olğan Ukrayina haritasında işğal etilgen Qırım yoq edi.
"Ukrayina destek ve diqqat içün minnetdar olsa da, böyle küçük hatalar bile müim ola. Rusiye muntazam sürette "Qırımsız haritalar"nı öz teşviqatınıñ bir parçası olaraq qullana", — dep UNITED24 Instagramda yazdı.
Bundan ğayrı, alıp barıcı Zelenskıynıñ komediya oyuncılığı karyerası aqqında aytıp, siyasiy karyerasınıñ ihtimaline işandırdı ve 2026 senesi ilk yaz ayından başlap The Late Show with Stephen Colbert leyhasında televizion işini toqtatmağa planlaştırğanını hatırlattı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
