Qırımda işğalciler tasil saasına tesirini quvetleştirmege tırışalar — mekteplerde ingliz tili dersleriniñ sayısını eksilteler, bunıñ yerine beşinci sınıftan başlap "ruhiy-ahlâqiy medeniyet" fenini ve ihtisasiy yönelişni kirseteler.
Qırımnıñ reintegratsiyası birleşmesi bunı bildirdi.
"Yañılıqlar" "zararlı" ingliz tili dersleriniñ qısqartıluvına, "Rusiye maneviy-ahlâqiy medeniyeti" ayrı bir ders olaraq, onıñ evelki teşviqat analogı — mecburiy er aftalıq "Müim şeyler aqqında subetleşüv" dersiniñ saqlanuvınen teşviqat şekliniñ kirsetilüvine ketire. Qoşma olaraq, duşmannen işdeşlikçiler beşinci sınıftan başlap mecburiy "proforientatsiya"nı kirseteler, talebeler ve ana-babalar bu saylavnı, elbette ki, kimse "inanmaycaq", — dep haberde qayd etildi.
Birleşme şunı da qayd etti ki, işğalli akimiyet Rusiye akimiyetiniñ kontroli altında olğan "Max" messenceriniñ mekteplerdeki subetlerde qullanılmasını "mecburiy" etti ve "davranışına köre baa qoyuv"nı amelge keçirmege vade ete.
Qırımnıñ reintegratsiyası birleşmesiniñ mütehassıslarınıñ fikirince, yarımadanıñ işğalli akimiyeti bu şekilde raatsız talebelerniñ nezaretini quvetleştirmege tırışa.
"Hatırlatamız ki, BMTnıñ İqtisadiy, içtimaiy ve medeniy aqlar eyyeti 78-inci sessiyasında işğal etilgen Ukrayina topraqlarında insan aqlarınıñ bozuluvı arasında tecavuzcınıñ tasil aqqına qast etüvine ayrı diqqat ayırıldı", — dep Qırımnıñ reintegratsiyası birleşmesi yazdı.
2025 senesi ilk küz ayınıñ 1-den itibaren Rusiyede ve vaqtınca işğal etilgen Ukrayina topraqlarında, hususan Qırımda, "Max" yañı Rusiye messenceriniñ qullanılması mecburiy oldı. Onı Kreml ve FSB kontrol etken "VK" şirketi azırladı. Qırımtatar resurs merkezi bunın bildirdi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
