İşğal etilgen Qırımda telükeli gidrometeorologik adiseler aqqında fevqulâde ihtar ilân etildi. Yaqın künlerde yarımadada küçlü yağmurlar, furtuna, burçaq ve yelniñ quvetleşmesi beklenile.
Rusiye kontrolindeki Qırım FVN bu aqqında haber etti.
İşğal etilgen Qırım gidrometeorologiya ve etraftaki müitniñ nezareti idaresiniñ malümatına köre, ilk küz ayınıñ 9-nda aqşam, ilk küz ayınıñ 10-nda ve ilk küz ayınıñ 11-nde gece yarımadada yağmur, bazı yerlerde pek küçlü (30-50 mm), furtuna ve burçaq yağması beklenile.
Şimal-şarqiy yelniñ 17-22 m/s qadar küçleşmesi tahmin etile. Qırımnıñ özenlerinde suv seviyesi telükeli işaretlerge yetmeden 0,5-1,5 m köterile bile.
"İlk küz ayınıñ 9-nda aqşam, ilk küz ayınıñ 10-nda kündüz ve ilk küz ayınıñ 11-nde gece ağır ava şaraiti beklenile: küçlü yağmurlar, furtuna, burçaq, yel küçürip furtuna derecesine yetecek", — dep işğalli FVN haberinde qayd etildi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
