İlk küz ayınıñ 8-nde işğal etilgen Qırımda Keriç köprü ögünde nevbet peyda oldı — biñden ziyade maşna tura. Taman tarafından, Rusiye Federatsiyasınıñ toprağında, saat 14:00-te 380 naqliyat vastası, Keriç tarafından ise 747 maşna bekley. Tedqiq içün nevbette turmaq üç saatke yaqın süre.
Köpürdeki vaziyet aqqında operativ malümat Telegram kanalı bunı bildirdi.
"Taman tarafından elnen baqılması içün nevbette 380 naqliyat vastası tura. Beklev müddeti bir saatten çoq. Keriç tarafından elnen baqılması içün nevbette 747 naqliyat vastası tura. Beklev müddeti üç saatke yaqın ola", — dep haberde qayd etildi.
Hatırlatamız ki, işğalli Qırım yolbaşçısı Aksönov Telegramda bildirdi ki, "turistler"niñ çoqusı — 61%-i — işğal etilgen yarımadağa öz naqliyatınen Qırım köpründen kele. Daa 23%-i demiryolnı saylay, 2025 senesi yazda ise Ukrayinanıñ işğal etilgen topraqlarından işğal etilgen Qırımğa bütün "turistler"niñ 16%-i keldi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
