2025 senesi arman ayının 29-nda RFnıñ Novorossiysk civarındaki Qara deñizge eñ az 10 tonna neft mahsulatı tüşti. Uydu resimlerinde körüngenine köre, lekeniñ umumiy meydanlığı 350 kvadrat kilometrni teşkil ete ve işğal etilgen Qırımğa doğru areket etmege devam ete.
TASS Rusiye devlet agentligine, deñiz qurtaruv hızmetinen işbirlikte bulunğan uzaqtan teşkerüv usullarınıñ mütehassısı Serğiy Stanıçnıy bunı bildirdi.
"Novorossiysk civarında yaqarlıq tüşkeni neticesinde Qara deñizge yaldap kelgen neft mahsulatınıñ meydanlığı, soñki malümatlarğa köre, tahminen 350 kvadrat kilometr teşkil ete. Neft mahsulatlarınıñ eñ minimal miqdarı 10 tonnadan ziyadedir", — dep Serğiy Stanıçnıy bildirdi.
Evel, arman ayınıñ 30-nda yapılğan uydu ölçevleri, alan 75 kvadrat kilometr olğanını ve eñ az 4-5 tonna neft mahsulatı çıqqanını bildirdi. Şimdi ruslar büyük felâket aqqında bildireler.
"Şimdiki suretlerde 350 kvadrat kilometrni teşkil ete, menim tecribeme köre, deñizde böyle büyük leke daa körünmedi. Ve o, bu çeşit neft mahsulatları içün leke pek qalın qala. Bu demek ki, şimdilik eñ az 10 tonna neft mahsulatından ibaret, o Anapanıñ ğarbında yerleşe, Anapanıñ şimalinde yalığa küçük bir qısmı çıqa bilir. Bu leke Qırımğa doğru areket ete, amma şimdilik Keriç boğazından cenüpkece", — dep Stanıçnıy bildirdi.
Hatırlatamız ki, arman ayınıñ 29-nda Novorossiysk limanında tankernen yük operatsiyası vaqtında neft mahsulatınıñ tüşmesi qayd etildi. Hazar boru ağı konsortsiumı (HBK) Novorossiysk civarındaki deñiz terminalında üç çıqış yalı cihazlarından (ÇYC) birini — ÇYC-2ni — fevqulâde vaziyetten soñ müddetsiz şekilde söndürdi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
