İşğal etilgen Qırımda şiddetli yel sebebinden eki künge furtuna havfı ilân etildi. 15-20 m/s tezliginde yel tahmin etile. İşğalciler Qırım sakinlerini dağ ve ormanlarğa ketmemege, deñiz ve suvlarğa çıqmamağa çağıralar.
İşğalli Qırım FVN bu aqqında haber etti.
"Qırım gidrometeorologiya ve etraftaki müitniñ nezareti idaresiniñ malümatına köre, arman ayınıñ 29-nda kündüz ve 30-nda gece yarımadada 15-20 m/s tezliginen şimaliy-şarqiy yel esecek", — dep haberde qayd etildi.
İşğalli qurtarıcılar, energetika ve kommunal hocalıq obyektlerinde qazalar, naqliyat ağlarınıñ bozuluvı ve yollarda, hususan dağ keçitlerinde, areket qıyınlaşuvınen bağlı fevqulâde vaziyetlerniñ yüksek ihtimali aqqında tenbiyeleyler.
"İnsanlar içün ayat ve sağlıq telükesi bar, çünki reklama levhaları, ağaçlar, qaviy olmağan inşaatlar ve elektrik ağları tüşe bile. Vatandaşlarnı diqqatlı olmağa, dağ ve ormanlarğa barmamağa, deñiz ve suvlarğa çıqmamağa çağıralar", — dep işğalli müessise qoştı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
