Mustaqillik künü munasebetinen keçirilgen bayramlar devamında Ukraina Prezidenti Zelenskıy, asıllı qırımtatar ukrain yırcısı Camalanı III dereceli knâginâ Olğa ordeninen mukâfatlandırdı.
Bu aqta Facebook-ta QMC-de Ukraina Prezidentiniñ vekilligi bildirdi.
"Bu orden – qadınlarğa içtimaiy faaliyetniñ çeşit saalarında köstergen yüksek hızmetleri içün devlet mukâfatıdır. Qırımdan kelgen ressamlarnıñ, hususan tamır halqlarnıñ vekilleriniñ devlet seviyesinde tanılması ukrain cemiyeti içün soñ derece müimdir", – denile beyanatta.
Camala özü, öz İnstagram-ında bu devlet mukâfatı onıñ içün hoş ve beklenilmegen olğanını yazdı. Aynı vaqıtta, itibarlılar arasında mukâfatnı ölümden soñ alğanlar da olğanı onı kederlendire.
"Mustaqillik kününde böyle yüksek mukâfat almaq pek hoş ve beklenilmegen. Bu em quvanç, em de aynı vaqıtta keder, çünki mukâfatlanğanlar arasında mukâfatnı ölümden soñ alğanlar da bar. Biz öyle bir aqiqatta yaşaymız ki, er künniñ fiyatı yüksek, bu er kün arta, çünki er kün biz halqımıznı coyıp ketemiz. Biz öz qorçalayıcılarımızğa teşekkür bildirmege mecburmız, olarnıñ sayesinde biz bu mustaqilligini saqlaymız", — dep yazdı yırcı.
Camalanıñ Instagram-ından skrinşot. Instagram/Джамала
Telegram, WhatsApp, Facebook ve YouTube-ta Suspilne Qırım haberlerine abune oluñız
