Qırımdaki Körbekül yapma gölüniñ suv yedekleri 4,8 mln m³ teşkil ete, bu ise tolu miqdarınıñ 38%-ini teşkil ete.
"Voda Krıma" işğalli şirketiniñ reberi Maksim Novik bunı bildirdi.
Onıñ aytqanına köre, yedekler yılnıñ soñuna qadar yetecek.
"Bugünki künlik suv qullanuvınen suv resursı yılnıñ soñuna qadar, yağanaqlar mevsimine qadar yeter. Bundan evel Aluşta şeer bölgesiniñ çoqusı yerli menbalar, meselâ, çoqraqlar, quyulardan suv alğan mesken yerlerinde suv berüv cedveli tizilgen edi", — dep haberde qayd etildi.
Hatırlatamız ki, işğal etigen Aluştada suv qıtlığı sebebinden soqaqlarda suv anbarları qoyuldı. Çapçaqlardan tehnikiy ihtiyaclar içün suv almaq mümkün. Arman ayınıñ 6-nda Aluşta memuriyetiniñ işğalli yolbaşçısı Galina Ogneva bunı bildirdi.
"Qurulıq ve yağanaqlarnıñ yetersizligi sebebinden belediyede suv teminatınen bağlı devam etken qıyın vaziyet sebebinden, tehnikiy suvnen qoşma yapma göllerini qurmağa aqqında qarar alındı. Bu tedbir, eali içün suv qıtlığınıñ aqibetlerini yımşatmaq içün yapıldı", — dep yazdı o.
İşğal etilgen Qırım sıcaq ve yapma göllerindeki yedeklerniñ eksilüvi sebebinden suv qıtlığına oğradı.
Arman ayınıñ 1-ne qadar tabiiy suvnıñ miqdarı 100 million kubometrden az oldı, keçken seneniñ köstergiçlerinden bayağı az. "Sputnik u Krımu" işğalli mediasınıñ canlı yayınında "Vernadskıy adına QFUniñ Biohimiya tehnologiyaları, ekologiya ve farmatsiya institutı" suv qullanuvınıñ himiyeviy tehnologiyaları kafedrasınıñ müdiri İllâ Nikolenko bunı bildirdi.
Bir ay içinde 13 million kubometrge suv azlaştı. Teñeştirmek içün, keçken seneniñ aynı künü yapma göllerinde 160 million kub bar edi, 2024 senesi oraq ayında ise 17 million kub ğayıp olundı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
