Rusiye FSBsi, Qırım köpründe küçlü bomba patlatmaq ıntıluvını toqtatqanını ve "terroristik areket azırlağanı"nda şübheli sayılğan adamnı yaqalağanını bildirdi.
RİA "Novosti Krım" bunı bildirdi.
"Elektronik patlayıcınen yüklengen maşna bir sıra memleket vastasınen Ukrayinadan Rusiyege kelip çıqtı. O, Rusiye-Gürcistan sıñırını Şimaliy Osetiya Cumhuriyetin — Alaniya "Verhniy Lars" halqara keçit noqtasında keçti ve Krasnodar ülkesine ketmek kerek edi", — dep haberde qayd etildi.
İşğalcilerniñ aytqanlarına köre, bombanen maşna başqa aydavcığa berilecek edi — o, Qırım köpründen Qırımğa çıqmaq kerek edi, agentlikniñ yazğanına köre, aydavcı, teraktnıñ kerçekleştirilmesinde iştirak etecegi aqqında bilmey edi.
"Russia today" teşviqiy resursı da sorğuğa çekilgen şahısnıñ ifadelerini ketirdi.
"Oña kurator muracaat etip, avropalı memleketten onıñ adına maşna ketirilgenini, pasport ve aydavcı şeadetnamesi kerek olğanını bildirdi. Maşnanı o, Solntseve şeerinde alacaq edi, soñra ise Qırım köpründen keçip Qırımğa baracaq edi", — dep haberde bildirildi.
Hatırlatamız ki, Ukrayina mahsus hızmetleri Qırım köprüne üç kere ücüm etti. Hususan, UHH mahsus operatsiyanı ilk yaz ayınıñ 3-nde keçirdi.
Köpürni suv astında urmaq içün, er biri 1100 kilogramm ağırlığında patlayıcı eki kere esas tiremelerge qoyulğan edi. Böyleliknen, suv astındaki tiremelerniñ bir qısmı yerastı seviyesinde zarar kördi. UHHniñ yolbaşçısı Vasıl Malük jurnalistlerge bunı añlattı.
UHHniñ Arbiy-deñiz quvetleriniñ matbuat nutuqçısı Dmıtro Pletentçuknıñ "Suspilne Studiya" canlı yayınında bildirgenine köre, köpür qanuniy arbiy maqsat olıp qala, ve er bir zararı işğalcilerniñ logistika imkânlarını boza.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
