İşğalli Qırım akimiyeti yerli gençlerniñ "göñülli yardım" olaraq Kursk vilâyetine çıqışlarını teşkil ete. Talebeler qurucılıq işlerine ve teşviqat tedbirlerine celp etile. Bu endi on ekinci böyle "gumanitar missiya"dır.
Milliy muqavemet merkezi (MMM) bu aqqında haber etti.
Gruppa erkânına "Vernadskıy adına Qırım federal universiteti"niñ, cemaat aşaytı ve ticaret kolleciniñ studentleri, em de işğalli memuriyetlerniñ gençler şuralarınıñ azaları kirdiler.
MMMniñ malümatına köre, gençlerniñ Kursk vilâyetine Kreml teşviqatınen bağlı qurucılıq işlerini yapmaları içün mecburen yollaylar.
"Aqiqaten bu ziyaretler Kremlniñ ukrayin studentlerini istismar etüv ve olarnı mefküreviy ceetten işlep çıqaruv kampaniyasınıñ bir qısmıdır. Böyle tedbirler, ögretüv ve inkişaf ettirüv yerine, yaşlarnı Rusiye Federatsiyasınıñ arbiy sistemasına qoşa ve Rusiye ordusı içün askerlikke kütleviy çağıruv yedegini teşkil ete", — dep Milliy muqavemet merkezi bildirdi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
