Arman ayınıñ 11-nde işğal etilgen Qırımda Keriç köprü ögünde nevbet peyda oldı — bir buçuq biñden ziyade maşna tura. Taman tarafından, Rusiye Federatsiyasınıñ toprağında, saat 10:00-ğa qadar 1345 naqliyat vastası beklene, Keriç tarafından — 705 maşna beklene. Nevbette turmaq içün tahminen üç saat kerek.
Köprüdeki vaziyet aqqında operativ malümat aqqında Telegram kanalı bunı bildirdi.
"Taman tarafından elnen baqılmaq içün nevbette 1345 naqliyat vastası tura. Beklev müddeti üç saatten çoq. Keriç tarafından elnen baqılmaq içün nevbette 705 naqliyat vastası tura. Beklev müddeti eki saatke yaqın", — dep haberde qayd etildi.
Saat 9:00-da Keriç tarafında nevbette 553 maşna, Taman tarafında ise 1310 maşna tura edi.
Qırım köprüne Taman tarafından tek A-290 avtomobil yolunen barmaq mümkün. Devlet teşkerüv idaresi bunı bildirdi. Diger yollar ketmek içün yasaq etildi. Taman stantsiyasından köpürge çıqışlar tehnikiy vastalarnen qapatıldı.
Hatırlatamız ki, işğal etilgen Qırımda Yalta ve Alupkada yük naqliyatınıñ kündelik kirişini sıñırladılar. Yasaq 3,5 tonnadan ziyade ağırlıqta olğan maşnalar içün ve anomal sıcaqnen bağlı — bölgede +32°C-den ziyade sıcaq, bu ise yol örtüsiniñ bozulmasına ketire bile.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
