İşğal etilgen Yaltada landşaft yanğını söndürile — anda quru otlar yanıp ketti. Yanğınnıñ meydanlığı, tahminen 2 gektarnı teşkil ete.
Bu aqta işğal Qırım Fevqulâde vaziyetler nazirligi yaza.
"Evelki malümatlarğa köre, yanğın, 2 gektarğa yaqın yerni qapladı. Yerinde tahminen 150 mütehassıs ve 41 tehnika çalışa, olarnıñ arasında Rusiye devlet qazaiy hızmetiniñ eki vertolötı bar. 30 tonnalı suv endi aviatsiyası tarafından tüşürildi", – denile beyanatta.
Rusiye nezareti astında olğan idareniñ malümatına köre, yarımadada endi 20 gektar orman yandı, oraq aynıñ 28-den arman aynıñ 3-ne qadar Qırımda 115 quru ösümlik yanğını olıp keçti.
Hatırlatamız ki, arman aynıñ 9-dan 12-ne qadar işğal etilgen Qırımda furtuna aqqında haberdarlıq ilân etildi.
Telegram, WhatsApp, Facebook ve YouTube-ta Suspilne Qırım haberlerine abune oluñız
