V. N. Karazin adına Harkov milliy universitetinde unikal magistratura programması — "İşğalsiz topraqlarda devlet idaresi" başlana. Onıñ maqsadı deokkupatsiyadan soñ Qırım, Donbass ve diger vilâyetler içün menecerlerniñ azırlanmasıdır.
Bu aqta Ukraina Prezidentiniñ Qırım Muhtar Cumhuriyetindeki vekilligi bildirdi.
Programmanıñ esas maqsadı – territoriyalar deokkupatsiyadan soñ keçici devir şaraitinde semereli çalışmağa bilgen devlet idarecileriniñ zemaneviy korpusını şekillendirmektir. Hususan, o, turğun idare etmekni teminlemege, azat etilgen vilâyetlerniñ ğayrıdan bütünleşüvine ve cenkniñ neticelerini yeñmege diqqat ayıra.
Programmada halqara tecribeni ukrain köntekstini köz ögüne almaqnen birleştirgen er taraflama yanaşuvı közde tutula. Qırım Muhtar Cumhuriyetinde ve Sevastopol (Aqyar) şeerindeki vaziyetke ayrıca diqqat ayırıla. Oqutuv, qanun üstünligi, insan aqlarını qorçalav ve devlet müessiselerine işançnı tiklev ümdelerinde esaslana. Teşebbüsni "Devlet idaresi institutı" oquv-ilmiy institutı ve Ukraina Prezidentiniñ Qırım Muhtar Cumhuriyetindeki vekilligi birlikte işlep çıqtılar.
Telegram, WhatsApp, Facebook ve YouTube-ta Suspilne Qırım haberlerine abune oluñız
