Siyasiy közetici Vitaliy Portnikov "Serbest Qırımğa mektüpler" teşebbüsi çerçivesinde Qırım siyasiy mabüsi Vladlen Abdulkadırovnıñ mektübini oqudı.
Ukrayina prezidentiniñ Qırımdaki temsilciligi bunı bildirdi.
"Şimdi Qırım faalcisi Rusiyeniñ Arhangel vilâyetindeki İks qasabasında 21-nci tüzetüv müstemlekesinde buluna. Vladlenniñ sağlıq vaziyeti pek fenalaşa: az aşlanğanı sebebinden siyasiy mabüsniñ qara ciger ve büyrek meseleleri bar, körme qabiliyeti fenalaştı", — dep haberde qayd etildi.
Hatırlatamız ki, Vladlen Abdulkadırovnı işğalciler qanunsız sürette "terroristik faaliyet" içün 12 yılğa mahküm ettiler.
"Arhangelsk vilâyetinden yazam. 2024 senesi yazda mında Lipetsk vilâyetinden etap etildim. Öz qıymetli vaqıtıñıznı adaletsiz mahküm etilgen ve apis cezasını çekkenlerge qol tutqanıñız içün er keske teşekkürler bildirem", — dep siyasiy mabüs yazdı.
"Serbest Qırımğa mektüpler" aktsiyası 2023 senesi çiçek ayında başlandı. 2024 senesi devamında ukrayinler ve çetelde yaşağan Ukrayina dostları 1800-den çoq destek mektübini yazdılar. Teşebbüs Ukrayina Prezidentiniñ Qırım Muhtar Cumhuriyetindeki Temsilciligi, PEN Ukraine, ZMINA insan aqları merkezi, Crimea Daily, QırımSOS, Qırım esnası ve diger ortaqlarnıñ birleşken ğayretleri sayesinde kerçekleştirile.
Vladlen Abdulkadırov aqqında ne bilemiz
Qırımtatar Vladlen Abdulkadırov Özbekistannıñ Namangan şeerinde işçi qorantasında doğdı. 2001 senesi Qırımğa qayttı.
2016 senesinden başlap, apiske alınğanına qadar, faal balalarnıñ ananeviy bayramlarını, şu cümleden Qurban ve Oraza bayramlarını teşkil ete ve keçire edi, Aqmescit rayonınıñ Stroganivka köyüniñ abadanlaştıruvında iştirak ete edi. Meselâ, o ve qomşuları, apiske alınğanı sebebinden qurulışı bitirilmegen bala meydançığınıñ qurulışını qoydılar.
Bundan da ğayrı, Abdulkadırov qırım siyasiy mabüsleriniñ qorantalarına yardım ete edi, qırımtatar halqınıñ vekillerine qarşı makeme oturışlarına bara edi, siyasiy mabüsler içün SİZOğa berilüvlernen oğraşa edi.
2019 senesi martnıñ 27-nde Rusiye quvetçileri Qırım işğali başlağanından berli qırım musulmanlarınıñ evlerinde keçirilgen eñ büyük tintüvler neticesinde 25 qırımtatar cemaat faalcisini tuttılar, olarnıñ arasında Vladlen Abdulkadırov da bar edi. Olarnı "Hizb ut-Tahrir" islâm siyasiy firqasınıñ iştirakçisi olğanlarında qabaatladılar.
2022 senesi mayısnıñ 12-nde Rostov-na-Donudaki Cenübiy bölge arbiy makemesi siyasiy mabüs Vladlen Abdulkadırovnı 12 senege üküm etti. Daa soñ Moskva civarındaki Vlasiha şeerindeki Apellâtsiya arbiy makemesi ükümni deñiştirmedi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
