Qırımda işğalciler adamnı "devlet hainligi" içün mahküm ettiler

İşğal etilgen Qırımda Keriç rayonından bir adam "devlet hainligi" içün 13 yıl sert rejimge mahküm etildi. İşğalli quvetçiler, o, "Ukrayina istihbaratına Rusiye Federatsiyasınıñ arbiy obyektleriniñ malümatı ve geolokatsiyasını berdi", dep iddia eteler.

İşğalli Qırım prokurorlığı bunı bildirdi.

"2022 senesi adam, "mahsus arbiy operatsiya" keçirilmesine qarşı olıp, içtimaiy ağlardan birinde Ukrayina Baş istihbarat idaresiniñ temsilcisinen bağ qurdı, oña Rusiyege qarşı faaliyetinde yardım etmege azır olğanını bildirdi. Ukrayin idarecileriniñ vazifesine köre o, Keriç şeerinde neft bazası ve RF Milliy gvardiya orduları Federal hızmetiniñ arbiy qısımları, em de RF Mudafaa nazirliginiñ obyektleri aqqında malümat topladı. Geolokatsiyalarınen ekran süretlerini, yerleşken yerlerini qayd etip, o, messencerlerden birisini qullanıp, Ukratina Bİİniñ temsilcilerine yolladı", — dep aytıla haberde.

Ukraina tarafı bu malümatnı izaatlamay.

İşğalli Qırım mahkemesi şübhelige sert rejimli müstemlekede 13 yıllıq üküm çıqardı, soñra 1 yıl ve 10 ayğa azatlıqtan sıñırlanacaq. O, "devlet hainligi" maddesine köre mahküm etildi.

Hatırlatamız ki, işğal etilgen Qırım Yuqarı mahkemesi Keriç sakini "devlet hainligi" içün sert rejimli müstemlekede 16 yıl ve 6 ayğa üküm etti, bundan soñra 1 yıl ve 6 ayğa azatlıqtab sıñırlandı ve para cezası berildi. "Tahqiqat"nıñ versiyasına köre, o, Ukrayina Mudafaa nazirliginiñ Baş istihbarat idaresine Keriçte ava mudafaası vastalarınıñ bulunması aqqında malümat berdi, bunıñ içün "5 biñ ruble (1500 ğrıvnâ — muar.) miqdarında para mukâfatını aldı".

Keriçli aqay ve apay — Serğiy Kozlov ve Yevğeniya Samoylova — Rusiye tarafından "devlet hainligi"nde ve "Qırımda terakt azırlağanı"nda qabaatlanalar. Olarnı 2024 senesi çiçek ayında yaqaladılar ve Qırım sakinleriniñ bulunğan yeri aqqında alâ daa haber etilmey edi. Şimdi belli olğanı kibi, olarnıñ davası boyunca ilk mahkeme oturışı arman ayınıñ 4-ne Rostov-na-Donu şeerindeki Cenübiy bölgeniñ arbiy mahkemesinde keçirilecek.

Читати ще