Vaqtınca işğal etilgen Qırımda Rusiye quvetçileri Feodosiyada (KefeRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki adde) yaşağan insannı yaqalağanlarını bildirdiler. Onı "Ukrayina mahsus hızmetlerine arbiy obyektler, arbiy-deñiz silâlı quvetleri ve limanda gemilerniñ areketleri aqqında malümat bergeni"nde qabaatlaylar.
Rusiye kütleviy haber vastaları, FSBniñ beyanatına esaslanıp bunı bildirdi.
Rusiye mahsus hızmetiniñ versiyasına köre, adam Ukrayina havfsızlıq hızmeti ve Ukrayina Mudafaa nazirliginiñ Baş istihbarat idaresi temsilcilerinen öz başına bağ qurdı. İnternet-messenceri vastasınen o, Rusiye arbiy bölükleriniñ yerleşüv yerleri, ava mudafaası sistemalarınıñ yerleşüvi ve Fodosiya (Kefe) deñiz ticaret limanında yük gemileriniñ areketleri aqqında malümat bere edi.
Şimdilik adam apiske alındı, oña qarşı cinaiy dava açılıp, "devlet hainligin"de qabaatlandı. Onıñ adı ve qabaatlavlarğa munasebeti aydınlatılmay. O, Rusiye mahkemesinde qabaatını tanısa, ömürlik apis cezasını ala bile.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
