2025 senesiniñ birinci yarısında işğal etilgen Qırımda tintüvlerniñ sayısı eksilgenine baqmadan, siyasiy ve diniy sebeplerden qırımtatarlarnıñ taqip etilüvi devam ete.
Bunı tintüvler vaqtında insan aqlarınıñ bozulğanını qayd etken Qırımtatar Maaliy Merkeziniñ malümatları kösterdi.
2025 senesiniñ birinci yarısında vaqtınca işğal etilgen Qırımda 23 tintüv qayd etildi, olardan 12-si tamır qırımtatar halqınıñ vekilleriniñ evlerinde edi.
Teñeştirmek içün, 2024 senesiniñ aynı devirinde böyle 51 adise oldı, olardan 34-ü — qırımtatarlarnıñ evlerinde edi, 2023 senesiniñ birinci yarısında ise — 37 edi, ve olardan 29-ı qırımtatarlarnıñ evlerinde edi.
"Böyleliknen, davalarnıñ sayısı azlaşsa da, siyasiy ve diniy sebeplerden yapılğan taqipler yarımadanıñ işğalinden berli deñişmey", — dep QMM qayd etti.
Tintüv vaqtında quvetçiler zarar körgenlerniñ aqlarını bozalar. Hususan, evge kiriş vaqtında mülkke zarar ketirüv, ya da saip olmağan yerde tintüv keçirüv, ya da yasaq etilgen edebiyatnıñ qoyulması qayd etildi.
Telegram, WhatsApp, Facebook, TikTok ve YouTubede Suspilne Qıım haberlerine abune oluñız
