Sevastopolda (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki adda) bir qadınnı internette anonim şekilde yazğanları içün mahkeme etecekler. İşğalli uquq qorçalayıcılar onı "Rusiye ordusı aqqında yañlış malümat tarqatqanı, Rusiye Federatsiyasınıñ reberligini itibardan tüşürgeni ve milliy ve ırq mensüpligine köre nefret doğurğanı"nda qabaatlaylar. Qadın 10 yıllıq apis cezasını ala bilir.
İçki işler nazirliginiñ Sevastopol (Aqyar) şeerindeki işğalli idaresi bu aqqında haber etti.
"Rusiye İçki işler nazirliginiñ aşırıcılıqnen küreş merkeziniñ hadimleri Sevastopolda internette, müellifi RF arbiy quvetleriniñ mahsus operatsiyası ve areketleri aqqında yañlış malümatlarnen tefsirlerni faal sürette qaldırğan ve şeer toprağında ava telükesi signallarından memnün olğan saifeni taptılar. Öz areketleriniñ qanunsız olğanını bilip, belli olmağan şahıs Ukrayina tarafdarı olğan subetlerde duyğularını paylaşqan ve malümatını gizlemege tırışqan edi — er ay adını deñiştirgen edi", — dep işğalli uquq qorçalayıcılar bildirdiler.
İşğalciler bu esapqa 38 yaşındaki Sevastopol sakini alâqası olğanını iddia eteler. Olarnıñ malümatına köre, qadın daa evel Kıyivde yaşağan edi, 2017 senesi ise mirası içün Sevastopolğa (Aqyarğa) keldi ve bu maqsatnen Rusiye pasportını aldı.
İşğalli mahkeme qadınğa "nefret doğurğanı ve ordunı itibardan tüşürgeni" içün 69 biñ rublelik (tahminen 28 biñ ğrıvnâ) para cezasını berdi. Amma oña qarşı "Rusiye Silâlı quvetleri aqqında bile-bile yañlış malümat tarqatqanı" içün cinaiy dava açıldı. Qadınnı Rusiye gvardiyasınıñ "Berkut" OMON askerleri tuttılar.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
