Keriçniñ eki sakini "Ukrayina istihbaratınen işbirlik yapqanı, işğal etilgen Qırımda patlavlarnı azırlağanı, devlet hainligi ve terroristik faaliyeti"nde qabaatlana.
Sevastopol (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad) şeeriniñ işğalli prokurorlığı bunı bildirdi.
Tahqiqatnıñ malümatına köre, olar Ukrayina Mudafaa nazirliginiñ Baş istihbarat idaresinen 2023 senesi ilk küz ayında bağ tuttılar.
Dava mabüslerinden birini 2023 senesi orta küz ayında Keriçte Rusiye arbiy timsallerinen maşnanı ateşke berüvde qabaatlaylar. Bundan ğayrı, uquq qoruyıcılarnıñ malümatına köre, eki şübheli "demiryol astyapısını patlatmağa ve Sevastopolda Rusiye arbiy hızmetçisine ücüm etmege" tırıştı.
Rusiye quvetçileri bildirdiler ki, olarnı 2024 senesi çiçek ayında Sevastopolda (Aqyarda), gizli yerden patlayıcı cihazlarınıñ parçalarını almağa tırışqanda yaqaladılar.
Qabaatlav terroristik faaliyetke azırlanuv, devlet hainligi, patlayıcı aletlerni azırlav ve saqlav ve terroristik areketke azırlav maddelerine istinaden yapıldı.
Qabaatlanğanlardan iç bir açıq beyanat yoq.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
