21-nci ayrı mehanizatsiyalı brigada bildirdi ki, Sumı vilâyetindeki küreş vaqtında Sevastopolda (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki adda) yerleşken Rusiye Federatsiyasınıñ Qara deñiz flotunıñ 810-ncı deñiz piyade brigadasınıñ bölüklerinden 10 arbiyi esir alındı. Esirler arasında Qırım sakinleri de bar.
21-nci ayrı mehanizatsiyalı brigadanıñ resmiy saifesinde bu aqqında aytıla.
"Esir alınğanlar arasında "Vatan hainligi" içün apis müddetini arttırmaq telükesinen apishanede añlaşma imzalamağa mecbur etilgenler, em de işğal etilgen Qırımda yalıñız 10-12 kün evelsi hızmet etken ve soñra ücümge atılğanlar bar. Şimdi esirlerniñ ayatlarına bir telüke yoq, halqara gumanitar uquq talaplarına köre olarğa tibbiy yardım kösterile", — dep USQniñ 21-inci AMB bildirdi.
21-nci AMBnıñ derc etkeni videoda sorğuğa çekilgen esirlerden tek biri Qırım sakini — Yevpatoriya (Saq) rayonından Kurinoy İvan Volodımırovıç.
21-nci AMBnıñ matbuat hızmeti bildirdi ki, Rusiye Qara deñiz flotunıñ 810-ıncı deñiz piyade brigadası çoq yıl devamında Ukrayinanıñ Sevastopol (Aqyar) şeerinde bulunğan edi ve 2014 senesi yarımadanıñ işğali vaqtında iştirak etken edi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
