Qırım sakinler saba işğal etilgen Qırımnıñ Simferopol (AqmescitRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad) civarındaki Slovyanka özeniniñ suvlarında balıqlarnıñ kütleviy şekilde ölgenini kördiler. İçtimaiy ağlarda bu aqqında yazılar peyda oldı, işğalli akimiyet ise buña cevap berdi.
İşğal etilgen Qırım Tabiat nazirligi balıqlarnıñ kütleviy şekilde ğayıp oluvını resmen tasdıqladı.
"Qırım Tabiat nazirliginiñ hadimleri Laboratoriya talilleri ve tehnikiy ölçevler merkeziniñ mütehassıslarınen beraber Slovyanka özeniniñ bir qısmını ve onıñ suv qoruv zonasında yerleşken topraq damartılarını teşkerdiler. Mütehassıslar özenniñ kirliyici maddeleriniñ miqdarını belgilemek içün yerastı suvlarınıñ örneklerini aldılar", — dep aytıla haberde.
İşğalli nazirlik, teşkerüv vaqtında "suv obyektleriniñ qullanuvı ve qoruvı saasında tabiat qoruv qanunlarınıñ bozuluvı tapılmadı", dep bildirdi. Şunıñ içün, suvlarda balıqlarnıñ kütleviy şekilde ölmesiniñ sebebini aytmaq mümkün degil.
"Slovyanka özeniniñ suv alanında balıqlarnıñ ölümi qayd etildi. Qırım Cumhuriyetiniñ Devlet veterinariya eyyetine suv resurslarınıñ ğayıp olmasınıñ sebeplerini ögrenmek içün tedbir alması içün muracaat yollanıldı", — dep "Qırım tabiat nazirligi" bildirdi.
İçtimaiy ağlarnıñ qullanıcıları saba Simferopolnıñ (Aqmescitniñ) Slovyanka özenindeki "Meganoma" rayonında balıqlarnıñ kütleviy şekilde ölümi aqqında haber etmege ve videolar derc etmege başladılar. Hususan, yerli "ÇP/Simferopol" Telegram kanalında.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
