Avropa Şurası Parlament Assambleyası (AŞPA) Qırım ve diger ukrayin topraqlarınıñ işğaliniñ qanunsızlığını tasdıqladı. İlk yaz ayınıñ 24-nde Strasburgda AŞPA sessiyası vaqtında qabul etilgen "Rusiye Federatsiyasınıñ Ukrayinağa qarşı tecavuzı kontekstinde uquqiy aspektleri ve insan aqları meseleleri" rezolütsiyasında bu aqqında aytıla.
Tış işler nazirligi bunı bildirdi.
Rusiye Federatsiyasınıñ tecavuzınıñ uquqiy aspektlerine dair qarar Ukrayinağa qarşı tecavuz cinayeti içün mesüliyetke çeküv yolunda müim adım ola, dep Tış işler nazirligi yazdı.
"Assambleyanıñ açıq-aydın uquqiy hulâsalarını qabul etemiz, şu cümleden: Rusiye, Belorusiye ve KHDCKoreya Halq Demokratik Cunmhuriyeti areketleriniñ istilâ olaraq tanılması; bu devletlerniñ siyasiy ve arbiy reberliginiñ şahsiy mesüliyetke çekilmesi; Qırım ve diger ukrayin topraqlarınıñ qanunsız işğaliniñ halqara uquqnıñ qaba bozuluvı olaraq tasdıqlanması", — dep müessise bildirdi.
Avropa Şurası Parlament Assambleyası (AŞPA) halqara toplulıqnı Ukrayina ve Rusiye arasında bütün cenk esirlerini tez vaqıtta deñiştirmek ve azat etmek içün muzakerelerni desteklemege çağırdı. "Cenk esirlerini deñiştirüv ve azat etüv boyunca siyasiy muzakerelerniñ desteklenmesi" adlı qabul etilgen rezolütsiyada bu aqqında aytıla.
"Bu vesiqalar AŞPAnıñ halqara uquqnıñ esas printsipleri, insan aqlarınıñ qoruvı, cezasızlıqqa qarşı küreş ve Rusiye tecavuzına qarşı küreşte Ukrayina halqınen birdemliginiñ uzlaşmaz destegi aqqında daa bir küçlü delil ola", — dep Tış işler nazirliginiñ haberinde qayd etildi.
Avropa Şurasınıñ Parlament Assambleyasınıñ Strasburg sessiyasında deñiştirüvlerge çağıruv rezolütsiyasını 88 mebus bir ağızdan destekledi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
