İlk yaz ayınıñ 16-nda işğal etilgen Keriçte yerli studentlerni Rusiye Mudafaa nazirligine boysunğan RFınıñ aliy arbiy oquv yurtlarına oqumağa celp etmek vazifesinde bulunğan "çıqış gruppası" çalışıp başladı. Bu "reyd" oraq ayınıñ 11-ne qadar devam etecek.
"Qırım platforması" teşebbüsiniñ saytında bu aqqında haber etildi.
"Vaqtınca işğal etilgen Keriçte Rusiye işğalli quvetleri yerli studentlerni Rusiye Mudafaa nazirligine boysunğan aliy arbiy oquv yurtlarına çağırmağa başladı. 2025 senesi il yaz ayınıñ 16-dan oraq ayınıñ 11-ne qadar şeerde, işğalci devletniñ arbiy aliy oquv yurtlarında tasil almaq içün namzetlerni ihtisasiy saylavdan keçirgen çıqış gruppası çalışa", — dep "Qırım platforması" haber berdi.
Hatırlatamız ki, işğal etilgen topraqlardan kelgen gençlerniñ istilâcı memleketniñ ordusına hızmet etmesine çağıruv — IV Jeneva şartnamesiniñ qaba bozuluvıdır.
"İşğal etilgen Qırımnıñ vatandaş ealisini Rusiye silâlı quvetleriniñ qurulışlarında mecburen ya da añlı tarzda iştirak etmesi — em milliy, em de halqara seviyede aqibetleri olğan arbiy cinayet", — dep "Qırım platforması" teşebbüsi qayd etti.
"İç kimse" studentler areketi bildirgenine köre, Qırım federal universitetinde erkek studentlerge, universitetten çıqarılğan soñ, birden askerlikke kütleviy çağıruv vesiqaları berile.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
