2026 senesi Rusiye akimiyeti, vaqtınca işğal etilgen topraqlardan (VİT) 56 biñ ukrain balasını işğal etilgen Qırımdaki sanktsiyalanğan "Artek" bala lagerine "reabilitatsiya" ve "yañıdan terbiyelev" içün yollamağa planlaştıra.
Bu aqta Ukraina Silâlı Quvetleriniñ mahsus ameliyatlar quvetleriniñ reberliginiñ bölügi — Milliy tirenüv merkezi (MTM) öz Facebook saifesinde kiraz aynıñ 21 künü haber etti.
"Bu raatlıq aqqında degil. Bu ukrain menliginiñ muntazam sürette yoq etilmesi aqqında. "Artek" çoqtan teşviqat zavodına çevirildi: militarizm, akimiyet kulti, er bir ukrain şeyge nefret mefküresi", – qayd etti MTM.
Merkez qoştı ki, vaqtınca işğal etilgen territoriyalardan balalarnıñ "Rus tedbirine" bütünleşüvi, doğrudan-doğru Jeneva konventsiyalarınıñ bozulmasıdır.
Hatırlatayıq ki, kiraz aynıñ 10 künü Ukraina Prezidenti Volodımır Zelenskıy, sanktsiyalar cedvellerini keñleştirip UMTMŞ (Ukraina Milliy telükesizlik ve mudafaa şurası) emirini eda etilmesi aqqında qararını imzaladı. Oña işğal etilgen Qırımdaki "Artek" adlı bala lager de kirsetildi.
Bundan evel MTM, işğal etilgen Qırımnıñ cenübiy yalısında "Artek"-te Ukrainağa qarşı cenkte iştirak etken Rusiye arbiyleri reabilitatsiya etilgeni aqqında haber etti.
Bundan da ğayrı, saban ayında Merkez, Merkeziy havfsızlıq hızmetiniñ işğalciler VİT-dan ukrain balalarınıñ cedvellerini şekillendirmege başlağanları aqqında haber etti. Olarnı "terbiyelemek" içün "Artek"-ke yollaycaqlar. Hususan, vaqtınca işğal etilgen Zaporijjâ vilâyetinden 70-ten ziyade bala yollamaq isteyler.
Telegram, WhatsApp, Facebook ve YouTube-ta Suspilne Qırım haberlerine abune oluñız
