Ukraina ükümeti, vaqtınca işğal etilgen territoriyalarından (VİT) ya da sürgünlikten soñ tış memleketlerden qaytqan balalar içün 50 biñ grivna miqdarında bir kerelik "köterüv" yardımını kirsetti. Bu qarar, balalarğa Ukrainanıñ idare etilgen territoriyasında havfsız müitte tezce uyğunlaşmağa yardım etmeli.
Bu aqta Ukraina içtimaiy siyaset nazirligi bildirdi.
Böyle "köterüv" yardımnıñ maqsadı – balanıñ ukrain cemiyetine bütünleşüv ve alışuv içün kelişken şaraitler yaratılmasıdır. Maddiy yardımını almaq içün Ukrainanıñ Balalar boyunca devlet hızmetine balanıñ qanuniy vekili muracaat ete bile.
İçtimaiy yardım ve subsidiyalarnıñ başqa çeşitlerine muracaat etkende qorantanıñ umumiy kelirini esaplağanda bu yardım esapqa alınmaycağı qayd etile.
İçtimaiy siyaset nazirligi, Ukrainağa qaytqan er bir bala içün özüne has olğan qaytuv ve yardım planı tizilgenini qayd ete. O, üç yardım paketini teminley: qısqa, orta ve uzun müddetli, şu cümleden ruhiy, tibbiy, içtimaiy, uquqiy ve reabilitatsiya yardımı. Kerek olsa, balanı qoranta terbiyesine qoymaq mümkün. Aile azaları da yardım alalar.
Telegram, WhatsApp, Facebook ve YouTube-ta Suspilne Qırım haberlerine abune oluñız
