Qırım işğalden azat etilecek soñ duşmannen işbirlik faaliyetine binaen mesüliyetke tahminen 200 biñ insan çekile bilir. Devletniñ maqsadı er kesni cezalamaq degil, adaletni ve akimiyetke olğan işançnı tiklemektir.
Ukrayina prezidentiniñ Qırım Muhtar Cumhuriyetindeki temsilcisi Olğa Kurışko "Lüstratsiya Ukrayinağa qarşı Rusiye tecavuzınıñ aqibetlerini yoq etüv aletlerinden biri nasıl ola bile" adlı matbuat konferentsiyası vaqtında bildirdi.
Tedbir iştirakçileri añlattılar ki, Ukrayina istilâsı başlağan soñ, Ukraina vatandaşlarınıñ işğalli akimiyetnen işbirlik yapqanına cevap bermege mecbur oldı. Duşmannen işbirlik faaliyetini cinaiy taqip etüv şimdi devletniñ bu kibi işbirlik vaqialarına cevap berüviniñ tek aleti ola. Lâkin bu yanaşma er bir vaqianı qaplap almay. İşte bu sebepten, keçici adaletniñ tesirli bir çezilüvi lüstratsiya ola bilir.
"Cinayet qanunlarınıñ maddelerini alıp, 11 yıl devamında işğal etilgen Qırımdaki vaziyetke baqsaq, tek bu maddelerniñ resmiy terkibine köre tahminen 200 biñ insan mesüliyetke çekilmek kerek. Bazılarını sayıp olamaymız, çünki belli bir statistik malümatımız yoq, meselâ, vazifelerniñ aktual sayısı ya da faaliyet köstergen uquqiy ya da fizikiy şahıslar aqqında. Bu soñki noqta degil", — dep Kurışko qayd etti.
Onıñ aytqanına köre, cemiyetten adaletniñ tiklenmesi içün bir muracaat bar. Amma işğal etilgen topraqlarnıñ bütün sakinlerini işğalli memuriyetlernen alâqada olğan er angi areketleri içün mesüliyetke çekmek talabı yoq.
"Lüstratsiya — azat etilgen topraqlarda işğalden soñ çalışıp başlamaq kerek olğan devlet institutlarına işançnıñ ğayrıdan tiklenmesini temin ete bilecek devletke teklif ete bilecek elementlerden biridir", — dep prezidentniñ temsilcisi qoştı.
Tedbir iştirakçileri "Lüstratsiya Ukrayinağa qarşı Rusiye silâlı tecavuzınıñ aqibetlerini yoq etüv vastalarından biri nasıl ola bile" adlı eki yıl devamında azırlanğan analitik yazını taqdim ettiler. Vesiqa azırlanğanda cemaat sektorı ve devlet akimiyet organlarınıñ vekillerinen mesleatlar keçirildi.
"Vesiqa, akimiyet organlarına işançnı ğayrıdan tiklemek ve temin etmek, Rusiye Federatsiyasınen işbirlik şekilinde özüni itibardan tüşürgen şahıslarnıñ menfiy tesirinden saqlanıp, anayasa tertibini qorçalamaq içün lüstratsiya tedbirleriniñ mümkün sistemasını taqdim etmek maqsadınen azırlandı", — dep analitik notanıñ müelliflerinden biri, "Azones" AB ortağı Darya Svırıdova añlattı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
