Ukraina havfsızlıq hızmetiniñ "Pavutına" büyük mahsus operatsiyasından soñ, bozarğan aynıñ 1-nde, RF Ava-kâinat quvetleriniñ bombardıman uçaqlarına ücüm etilgen soñ, ava mudafaası esapları işğal etilgen Qırımda ava limanlarınıñ devriyini quvetleştirdi.
Bozarğan aynıñ 3-nde "Ateş" arbiy-partizan areketiniñ Telegram kanalında bu aqqında haber etildi.
Şu cümleden, Saq, Canköy ve Sarabuzda (eski Gvardiyske) ava limanlarınıñ qoruvı quvetleştirildi.
"Askerler bütün kün qaravullıq ve yorğunlıqtan şikâyet eteler — sebebi arttırılğan vazifelerni eda etecek hadimlerniñ azlığı oldı", — dep partizanlar qoştılar.
Olarnıñ malümatına köre, işğalciler Qırım ve Herson vilâyetiniñ memuriy sıñırında yük maşinalarınıñ teşkerüvini de quvetleştirdi.
UHHniñ "Pavutına" mahsus operatsiyası aqqında ne bilemiz
Bozarğan aynıñ 1-nde Rusiyede dört vilâyette uçucısız uçaqlarnıñ ücüm etkenini bildirdiler. Suspilneniñ menbaları bildirdiler ki, UHH uçucısız uçaqlar RF Ava-kâinat quvetleriniñ bombardıman uçaqlarına ücüm etti. Bu, İrkutsk vilâyetindeki "Belaya" arbiy uzaq uçuş aviabazası, Murmansk vilâyetindeki "Olenya" ava limanı, em de Rusiye Federatsiyasınıñ Râzan vilâyetindeki "Dâgilevo" ve İvanov vilâyetindeki "İvanovo" arbiy ava limanları.
UHHniñ yolbaşçısı Vasıl Malükniñ aytqanına köre, neticesinde 41 uçaqnı urıp oldılar, olarnıñ arasında — A-50, Tu-95, Tu-22M3 ve Tu-160. Ameliyatnıñ özü bir buçuq yıldır azırlanıla edi. Rusiye Federatsiyasınıñ strategik uçaqlarınıñ ukrayin UUAleri tarafından zarar körgenleriniñ fiyatı 7 mlrd dollarnı teşkil ete.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
