Rusiye apishanelerinde yedi saqat Qırım siyasiy mabüsi buluna. Kerekli tibbiy yardımnıñ olmaması, yaramay yaşayış şaraiti ve şikâyetlerniñ körmemezlikke urulması sağlıq vaziyetiniñ fenalaşmasına ya da ölümine ketire.
Qırımtatar maaliy merkezi bunı bildirdi.
Merkezniñ malümatına köre, şimdi qanunsız alda tutulğanlar arasında:
- Zekirya Muratov — III gruppa saqatı
- Timur İbragimov — III gruppa saqatı
- Servet Gaziyev — ekinci gruppa saqatı
- Amet Süleymanov — III gruppa saqatı
- Timur Yalkabov — III gruppa saqatı
- Rustem Seytmetmetov — III gruppa saqatı
- Mıkola Petrovskıy — III gruppa saqatı
- Remzi Kurtnezirov, ІІ derece saqatı, şimdi ev apsinde buluna.
"Bu insanlarnıñ hastalıqları ağır. SİZO ve apishanelerniñ yaramay şaraiti, sağlıqları aqqında şikâyetlerniñ red etilüvi, tibbiy yardımnıñ vaqtında berilmemesi, olarnıñ sağlıq vaziyetini fenalaştırıp tura. Ve, teessüf ki, facialı neticelerimiz endi bar — 60 yaşındaki siyasiy mabüs Cemil Ğafarov, ağır sağlıq meseleleri olğan 61 yaşındaki Kostântın Şırinğ ve 60 yaşındaki Rustem Virati vefat ettiler", — dep aytıla haberde.
Bundan da ğayrı, QMMniñ malümatına köre, FSB binalarında keçirgen sınavlar sebebinden aman-aman er bir Qırım siyasiy mabüsiniñ sağlıq alı fenalaşa.
"Rusiye Federatsiyası bu areketlerinen siyasiy mabüslerniñ eñ yüksek seviyeli fizikiy ve ruhiy sağlıq aqqını boza. Rusiye qanunlarına köre, ağır hastalıqları olğan insanlar apishaneden çıqarılmalı, çünki insan ayatı — eñ yüksek qıymettir, ve üküm ölüm cezasına çevirilmemek kerek", — dep Qırımtatar Maaliy Merkezi qayd etti.
Hatırlatamız ki, Krasnoyarsk vilâyetiniñ Minusinsk şeer mahkemesi 39 yaşındaki Qırım siyasiy mabüs Oleksandr Sizikovnı apisten azat etti. Sekiz aydan çoq apiste yatqan soñ, mayısnıñ 28-nde onı Soçide anası ve advokatı qarşıladı, adam ise Qırımğa yol aldı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
