Mayısnıñ 12-de Kıyivde Hreşçatikteki Baş poçta yanında "QIRIM İÇÜN / Заради Криму" malümat sergisi açıldı. Tedbir mayısnıñ 18-nde qayd etilgen Qırımtatar halqınıñ genotsid fedalarınıñ hatıra kününe bağışlana.
Bu, Qırımtatarlar cemiyet olaraq aqqında ekspozitsiya, dep Qırımtatar Milliy Meclisiniñ reisi Refat Çubarov tarif etti.
Hususan, sergi Qırımnıñ qıtaiy Ukrayinanen tarihiy bağını — Qırım hanlığından başlap XXI asırnıñ vaqialarına qadar añlata. Rusiyeniñ repressiv siyasetine diqqat ayırıldı: 1783 senesi yarımadanıñ ilhaqı, 1944 senesi genotsid, 2014 senesi işğal.
"Bu sergi vastasınen biz tek Ukrayin cemiyetiniñ haberdarlığını arttırmağa tırışmaymız. Lâkin biz insanlarnıñ añlamasını isteymiz ki, bugünki Qırım meselesi, Ukrayinanıñ tarihında, Ukrayina devletinde Qırımnıñ yeri — ayırılmazdır. Ve Qırım meselesini Ukrayina devletiniñ menfaatlarına qarşı çezmek ıntıluvları qabul etilmez", — dedi Refat Çubarov.
Onıñ aytqanına köre, Ukrayin devleti içün öz toprağınıñ bir qısmını teslim etmek teklifleri telükeli ola.
"Ne olsa da, Ukrayinanı Qırımsız qaldırmaq — bu devletimizni iqtisadiy ve arbiy telükesizlik ceetinden havfsız qaldıra. Umumen topraq teslimatı istilâcılarnı toqtatmay, aksine, istilâcılarnı quvetlendire. Ve Ukrayina mustaqil devletiniñ kelecegi — Qırımnen beraber bütün topraqlarınıñ saqlanuvıdır. Ukrayinanıñ er bir vatandaşı bu sergini baqıp, öz başına bu fikirge kelmesini isteymiz", — dedi Refat Çubarov.
Ukrayina prezidentiniñ Qırım Muhtar Cumhuriyetindeki daimiy temsilcisiniñ muavini Denıs Çıstikovnıñ aytqanına köre, cemiyetke Qırım aqqında hatırlatmaq kerek, ve bu serginiñ vazifelerinden biridir.
"Böyle tedbirler birinciden Ukrayina vatandaşları, ecnebiyler ve gençler içün keçirilmeli, çünki topraqlarımıznı qaytarmaq içün adımlar atqanımızğa qadar — olar bizim qala. Halqara toplulıqta şimdi Ukrayinanıñ 1991 senesiniñ sıñırlarında qalmaq içün diqqat celp etmek içün ne qadar ğayret sarf etkenini köremiz. Ve tamam bu — tarihımıznıñ saqlanıp qalması ve Ukrayina vatandaşlarınıñ onı kelecekke taşıması içün taş kibi küçük taşlardan biridir", — dedi Denıs Çıstikov.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
