İşğal etilgen Qırımda qartop fiyatı arta. Çiçek ayınıñ birinci on künü devamında bir kilogramm qartop 100 ruble olsa da, şimdi 150 rublege arttı, Qırım elmasınıñ fiyatından da çoq oldı.
Suspilne mühbiri bunı bildirsi. Fiyatlar artuvını yarımadada daa eki menba tasdıqladı.
Qırım agronomı (adı telükesizlik sebebinden bildirilmey) mühbirimizge bergen izaatında, fiyatlarnıñ artmasınıñ sebebi açıq topraq sebzeleriniñ, hususan, qartoqnıñ, az bereketi oldı, dep ayttı. 2024 senesi yazda ava quru ve sıcaq edi, ve neticesinde bölge bütünley öz sebze mahsulatını temin etip olamadı.
Onıñ içün sebze, hususan, işğal altındaki yarımadağa ketirilgen qartop, Rusiyeniñ bölgelerinden ketirile.
"Şimdi Qırım yarımadasınıñ aşayt bazarında Rusiye Federatsiyasınıñ diger bölgelerinden ketirilgen qartop satıla, onıñ soñki fiyatına logistika masrafları kirsetilgen", — dep Qırımnıñ Rusiye işğalli ükümetiniñ sanayı ve ticaret nazirligi bildirdi.
Aynı zamanda, işğalli müessise fiyatlarnı kötermek içün tedbirler alğanını bildirdi.
"Nebatat mahsulatınıñ fiyat vaziyetine kelgende, biz fiyatlandıruv şaraitini yaratmaq içün bir sıra tedbirler alıp baramız ve neticesinde — tükâncı içün oñaytlı ve, aynı zamanda müim — Qırım istisalcısı içün maqbul fiyat. Qırım Cumhuriyeti Köy hocalığı nazirligi tarafından topraq-iklim şaraitinde sebze ve qartoqnıñ içki istisalını arttırmaq içün bir sıra tedbirler alına. Tedbirler kompleksi em teşkiliy-içtimaiy tedbirlerni, em de devlet tarafından istisalcılarğa maliyeviy yardım kösterilmesini (sebze ve qartop östürüvine subsidiyalar) közde tuta", — dep aytıla haberde.
Bundan ğayrı, işğal etilgen Qırımnıñ Rusiye yolbaşçısı Sergey Aksönovnıñ evel aytqanlarına baqmadan, işğal etilgen Qırımda benzin fiyatları artmağa başladı.
Rusiye tarafdarı Qırım siyasetçisi Stepan Kiskinniñ fikirince, bu, Qırımnıñ Rusiye işğalli ükümetiniñ ihtisassızlığını köstere.
"Qırımnıñ neft satıcılarınıñ fiyat artmasına sebepler ne? Olar yoq, bu yönelişte yaqıt ve energetika naziriniñ işi de yoq, o, çoqtan berli yatqan Qırım Antimonopoliya eyyetini ve prokurolıqnı teşkermege mecbur edi. Bundan da ğayrı, Qırım yaqarlıq ve energetika nazirligi, yaqarlıq bazarında tertip-nizamnı tiklemek içün, öz devlet neft bazasına ve istisalcılarınen doğrudan-doğru añlaşmalarğa saip olmaq kerek. O vaqıt nazirlikniñ yaqıt bazarında tesiri olur edi. Bundan da ğayrı, o, köy hocalığınıñ istisalcılarınıñ işini qolaylaştırır ve Qırım sakinleri içün olarnıñ mahsulatınıñ fiyatını tüşürir edi. Amma bunıñ içün bu nazirlikte olmağan teşebbüs, ğayret ve iş kerek. Qırım neft satıcıları yerine elçi naziri olmaq ve vatandaşlarıñızğa yalan aytmağq daa qolay", — dep o, "Vkontakte" Rusiye içtimaiy ağında yazdı.
Qırım mühbirimizniñ malümatına köre, işğal etilgen Qırımda fiyatlar ep arta, bu ise istilâcı memleketniñ iqtisadiyatında inflâtsiyanıñ tez artqanını köstere.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
