Qırımtatar halqnıñ Meclis başı Refat Çubarov, Qırımnıñ taqdirini tek Ukraina ve tamır qırımtatar halqı çeze bilecegini bildirdi. O qayd etti ki, ukrainler ve qırımtatarlar öz devletini "Putinniñ emirinen Ukraina topraqlarına ücüm etken silâlı aydutlardan" qorçalaylar.
Bu aqta o, çiçek aynıñ 25-te AQŞ-nıñ Nyü-York şeerinde BMT-niñ tamır halqlar boyunca 24-nci daimiy forumında bildirdi, dep haber ete "Meclis" öz Facebook saifesinde.
"Qırım – tamır qırımtatar halqınıñ toprağı, o, onıñ Vatanı, ve, aynı zamanda, Ukrain devletiniñ ayırılmaz bir qısmıdır. Ve Qırımnıñ taqdirini tek Ukrain devleti ve tamır qırımtatar halqı çezecek. Men tamır halqlarnıñ yolbaşçılarını turğun inkişaf maqsatlarına irişmek içün topraq üstündeki tecavuz cenklerini bitirmek içün daa da küçlü ve qararlı olmağa çağırayım", – bildirdi Çubarov.
O, Forumnı qırımtatarlarğa işğalciler tarafından yapılğan basqılar ve taqipke diqqat ayırmağa çağırdı.
"Dünyada tamır halqlarnıñ er biriniñ öz şanlı, çoq vaqıt facialı tarihı bar. Amma olar episi silâlı canavarlar içeri kirgende evlerini qorçalamağa tırışalar... İç bir vaqıt kimsege tamır halqlarnıñ aqlarını, şu cümleden olarnıñ topraqlarına aqlarını bozmağa ruhset berilmemek kerek", – qayd etti Meclis başı.
O, em de Rusiyeniñ öz tamır halqlarını Ukrainağa qarşı cenkke qoşqanını qayd etti.
"Agressiya ve tecavuz cenkleri er vaqıt cinaiydir, amma Moskvanıñ Rusiyeniñ tamır halqlarınıñ vekillerini Ukrainağa qarşı cinaiy cenkte iştirak etmege mecbur etmek areketleri eki qat cinaiydir", – bildirdi Çubarov.
Qırımğa dair Ukraina ve AQŞ-nıñ soñki beyanatları
Çiçek aynıñ 22-de Zelenskiy kene de Ukraina Rusiye tarafından Qırımnı işğal etmekni iç bir vaqıt qanun ile tanımaycağını bildirdi, çünki bu esas qanunğa ve devletniñ suverenitetine qarşı kele. Bundan ğayrı, prezident Kiyevge Rusiye tarafından vaqtınca işğal etilgen ukrain topraqlarını deñiştirmek ya da olardan vazgeçmek aqqında muzakere etmek içün resmiy teklifler kelmegenini qayd etti.
Bundan soñ Amerika vitse-prezidenti C. D. Vens, eger AQŞ öz teklifine müsbet cevap almasa, Rusiyeniñ Ukrainağa qarşı cenkini toqtatacaq muzakerelerden çıqmağa azır olğanını ayttı. Onıñ aytqanına köre, Vaşington em Moskvağa, em de Kiyevge "çoq açıq teklif" yaptı ve "olarğa ya "ebet" demek vaqtı keldi, ya da AQŞ bu ceryandan çıqacaq".
Bu arada britan "The Telegraph" gazetasında AQŞ-nıñ Ukrainadaki cenkni bitirmek içün yedi noqtalı planı olğanı aqqında maqale basıldı, anda Qırımnı Rusiyege teslim etmek teklif etile.
Aynı vaqıtta AQŞ devlet kâtibi Marko Rubio, çiçek aynıñ 23-te Londradaki toplaşuvğa barmadı, anda Ukraina yetekçileri ve "istegenlerniñ koalitsiyasında" iştirak etici memleketlerniñ milliy havfsızlıq ve tışqı siyaset boyunca mesleatçıları iştirağınen Ukraina cenkini bitirmek meselesi muzakere etildi. Rubio yerine AQŞ prezidenti Donald Trampnıñ mahsus vekili Kit Kellog bar edi.
Çiçek aynıñ 23-de Tramp Zelenskiyniñ Ukraina Qırımnıñ işğalini iç bir vaqıt qanun ile tanımaycağı aqqında beyanatını tenqit etti. O, em de Ukraina içün şimdiki vaziyet "deşetli" olğanını qayd etti.
Telegram, WhatsApp ve Facebookta Suspilne Qırım haberlerine abune oluñız
